«Jon Uik 4» (JohnWick 4) filmi GDA-da yzygider üç hepde prokatyň lideri bolup gelýär
«Jon Uik 4» kinofilmi geçen dynç günleri $1,2 mln ýygnap, GDA ýurtlarynda prokatyň lideri boldy. Bu barada Kinobusiness portaly 6-njy aprelden 9-njy aprele çenli döwür boýunça habar berýär.
Çad Stahelskiniň filmi klanlaryň Dolandyryşyndan üstün çykmaga ymtylýan Jon Uikiň taryhyny ösdürmegi dowam etdirýär. Filmde baş keşpleri Kianu Riwz, Donni Ýen, Bill Skarsgard we Lorens Fişbern ýerine ýetirdiler.
Reýtingde ikinji ýeri «Meniň ajaýyp betbagtlygym» romantiki komediýasy eýeledi. Rojer Kamblanyň filmi öz geçmişinden gaçyp, başga şähere baran ýaş gyz Ebbi hakynda gürrüň berýär. Ol ýerde gyz Trewis atly oglana duşýar, ol oglan gizlin uruşlara gatnaşmak arkaly güzeranyny dolandyrýar. Filmde Dilan Sprous, Wirjiniýa Gardner, Otem Rizer, Braýan Ostin Grin, Rob Estes dagy surata düşdüler.
Üçünji ýerde Martin Brubulonyň «Üç muşketýor: Dartanýan» atly 6-njy aprelde çykan filmi ýerleşdi. Kinofilm Aleksandr Dýumanyň «Üç muşketýor» romanynyň nobatdaky ekranlaşdyrylmagydyr. Filmdäki keşpleri Fransua Siwil, Wensan Kassel, Romen Dýuris, Pio Marmaý, Ýewa Grin, Lui Garrel, Wiki Krips, Lina Kudri, Aleksis Mihalik we başgalar ýerine ýetirdiler.
ORIENT habarlar
