Türkmenistanyň we BMG-niň durnukly ösüş babatynda bilelikdäki hereketleriniň meýilnamasy ara alnyp maslahatlaşyldy
Türkmenistanyň hökümeti we BMG 2021-2025-nji ýyllar üçin durnukly ösüş babatynda hyzmatdaşlygyň Çarçuwalaýyn maksatnamasynyň çäklerinde netijeler boýunça Bilelikdäki toparlaryň duşuşygyny geçirdiler. Bu barada BMG-niň Türkmenistandaky hemişelik wekilhanasynyň saýtynda habar berilýär.
Gatnaşyjylar maksatnamalary ýerine ýetirmekde gazanylan üstünlige garadylar, şeýle hem 2023-nji ýyldaky bilelikdäki hereketleriň meýilnamasyny ara alyp maslahatlaşdylar.
Şeýlelikde, Çarçuwalaýyn maksatnamanyň bäş gutarnykly netijelerini gazanmakda ösüşe seredildi:
- Adamlaryň bähbidine gönükdirilen dolandyrma we kanunyň hökmürowanlygy;
- Durnukly ykdysady diwersifikasiýa, bäsdeşlige ukyply hususy we maliýe pudagy, giňeldilen söwda we onuň öňe sürülmegi;
- Betbagtçylyklaryň töwekgelçiliginiň kemelmegi, howanyň üýtgemegine uýgunlaşma we durnuklylygyň ýokarlanmagy;
- Saglygy goraýyşyň we durmuş taýdan goraglylygyň ýokary hilli we elýeterli hyzmatlary;
- Ýokary hilli, inklýuziw we elýeterli bilim we hünäri ýokarlandyrmak üçin ulgamlar.
Toparlaryň bilelikdäki başlyklary maksatnamany ýerine ýetirmek boýunça iş meýilnamalaryny hödürlediler we onuň gysga möhletli synyny geçirmekligiň zerurdygyny goldadylar.
Türkmenistanyň hökümeti bilen BMG-niň arasyndaky 2021-2025-nji ýyllar üçin durnukly ösüş babatyndaky hyzmatdaşlygyň Çarçuwalaýyn maksatnamasy ýurduň durmuş-ykdysady ösüşi boýunça milli maksatnamalary bilen ýakyn baglanyşyklydyr. Ol ýurduň 2030-njy ýyla çenli döwür üçin durnukly ösüş babatyndaky Gün tertibine we halkara borçnamalaryna ygrarlydygyny beýan edýär.
ORIENT habarlar
