Türkmenistan 2023-nji ýylyň ykdysady ösüşi boýunça Merkezi Aziýada öňdebaryjy bolup biler
Aziýa Ösüş Banky (AÖB) Aziýanyň Ösüşi-2023 (Asian Development Outlook) hasabatynda 2023-nji ýylda Türkmenistanyň jemi içerki önüminiň ösüşiniň 2022-nji ýylda gazanylan 6.2% we 2021-nji ýylda - 5.0% bilen deňeşdirilende 6.5% deň boljakdygyny çaklaýar.
Bu Merkezi Aziýa sebitinde şu ýyl üçin iň ýokary ykdysady ösüş depginidir, bu görkeziji Gazagystanda 3,2%, Gyrgyzystanda - 4,5%, Täjigistanda - 5,5% we Özbegistanda - 5% deň bolar diýlip çaklanylýar.
AÖB-niň hasabatynda: “Türkmenistanyň uglewodorod eksportyndan alýan girdejileriniň çak edilýän ösüşi şu ýyl we indiki ýyl döwlet býudjetiniň balansyny saklamaga mümkinçilik berer” - diýilýär.
Şeýle-de, hasabatda uglewodorod önümçiliginiň we eksportynyň ösüşiniň 2022-nji ýylda ýurduň ykdysadyýetiniň dikelmegine ýardam edendigi barada bellenilýär. “Serhetleriň açylmagy, halkara gatnawlaryň kem-kemden dikeldilmegi, ýurduň içinde hereketiň ýokarlanmagy, söwdanyň ösmegi we hyzmatlar pudagynyň gaýtadan dikeldilmegi ykdysadyýetiň ösmegine goşant goşdy”.
Türkmenistan öz gazyny Hytaýa, Russiýa, Azerbaýjana (Eýranyň üsti bilen) we Özbegistana, elektrik energiýasyny bolsa Owganystana, Eýrana, Gyrgyzystana we Özbegistana iberýär. Şeýle hem ýurdumyz nebit önümlerini, dokma önümlerini, mineral dökünleri we azyk önümlerini eksport edýär.
ORIENT news
