Gyrgyzystanda ilkinji gün elektrik stansiýasynyň Russiýa Federasiýasy bilen bilelikdäki gurluşygy badalga aldy
Gyrgyzystanyň premýer-ministri Akylbek Žaparow respublikada ilkinji gün elektrik stansiýasynyň düýbüni tutmak dabarasyna gatnaşdy – diýip, ýurduň Ministrler Kabinetiniň metbugat gullugy RIA Nowosti agentligine habar berdi.
"Ministrler Kabinetiniň başlygy Issyk-Kul raýonynyň Toru-Aýgyr obasynda kuwwatlylygy 300 MWt gün elektrik stansiýasynyň düýbüni tutmak dabarasyna gatnaşdy" – diýip, metbugat gullugynyň wekili aýtdy.
Elektrik stansiýasynyň gurluşygy baradaky ylalaşyga Gyrgyzystan-Russiýa hökümetara komissiýasynyň söwda, ykdysady, ylmy, tehniki we gumanitar hyzmatdaşlyk boýunça 29-njy martda Bişkekde geçirilen mejlisinde gol çekildi. Taslama Gyrgyzystanyň “Bişkek Solar” we Russiýanyň “Unigreen Energy” kompaniýalary tarapyndan durmuşa geçiriler.
Ministrler Kabinetiniň metbugat gullugynyň berýän maglumatyna görä, maýa goýumlarynyň möçberi 300 million dollardan geçer, elektrik stansiýasynyň gurulmagy we ulanyşa goýberilmegi 500-den gowrak iş ornunyň döredilmegini üpjün eder.
"Bar bolan mümkinçiliklerimize garamazdan, biz gün we geotermiki energiýany, ýel energiýasyny we biogaz tehnologiýalaryny doly ulanmaýarys. Gaýtadadan dikeldilýän energiýa çeşmeleriniň täze tehnologiýalary ygtybarly, durnukly we häzirki zaman energiýa çeşmesidir. Bu sarp edijiler üçin arzan, iň esasysy bolsa daşky gurşawa we adam saglygyna täsiri ujypsyzdyr. Gaýtadan dikeldilýän energiýa çeşmeleriniň ösüşi biziň ýurdumyzyň energiýa pudagynyň geljegidir" – diýip, hökümetiň metbugat gullugy Žaparowyň sözlerini getirýär.
ORIENT news
