Gümrük işgärleri üçin ozony zaýalaýan jisimleriň bikanun dolanyşygynyň öňüni almak boýunça seminar geçirildi
Türkmenistanyň Döwlet gümrük gullugynyň Okuw merkezinde ozony zaýalaýan jisimleriň bikanun dolanyşygynyň öňüni almak boýunça seminar geçirildi – diýip, edaranyň saýty habar berýär.
Türkmenistanyň gümrük edaralarynyň başlangyç taýýarlyk okuwlarynyň diňleýjileri seminaryň gatnaşyjylary boldular. Olar Türkmenistanyň ozon gatlagyny zaýalaýan jisimler baradaky Monreal teswirnamasy boýunça borçnamalarynyň ýerine ýetirilmegi, teswirnama girizilen Kigaliý düzedişleri, ozon gatlagyny goramak boýunça Wena konwensiýasy, şeýle hem bu babatdaky kanunçylyk namalary baradaky maglumatlar bilen tanyş boldular.
Çäräniň dowamynda ozony zaýalaýan jisimlere gümrük gözegçiligini amala aşyrmagyň usullary we olaryň barlag nokatlarynda ulanylyşy boýunça meseleleri ara alyp maslahatlaşdylar.
Seminar Türkmenistanyň Oba hojalyk we daşky gurşawy goramak ministrliginiň ýanyndaky Ozon merkezi tarapyndan BMG-niň senagat ösüşi boýunça ÝUNIO guramasy bilen billeikdäki taslamasynyň çäklerinde gurnaldy.
ORIENT habarlar
