Olimpiýa hereketi Türkiýedäki we Siriýadaky ýer titremelerinden ejir çekenlere kömek gaznasyny döredýär
Olimpiýa hereketi Türkiýede we goňşy Siriýada bolup geçen ýer titremesinden ejir çekenlere kömek bermek üçin adatdan daşary gaznanyň döredilýändigini yglan etdi.
Adatdan daşary gaznanyň möçberi Halkara Olimpiýa komitetiniň (HOK), şeýle hem Aziýanyň olimpiýa geňeşiniň (OCA) 250 müň amerikan dollaryna, Ýewropa olimpiýa komitetleriniň 250 müň ýewrosyna we Olimpiýa gaçybatalga gaznasynyň (ORF) 260 müň dollaryna deň bolan gatançlaryny goşmak bilen birlikde 1 million dollara deňdir.
«Men Türkiýäniň we Siriýanyň Milli olimpiýa komitetleriniň prezidentleri bilen gürleşdim, olar ýer titremäniň olimpiýa jemgyýetiniň köp agzalaryna eden täsiri barada gürrüň berdiler. Gynansak-da, ejir çekenleriň arasynda türgenler we olimpiýa hereketiniň agzalary hem bar, köpüsi öýsüz galdylar, sport infrastukturasyna çynlakaý zeper ýetdi» – diýip, Halkara olimpiýa komitetiniň prezidenti Tomas Bah aýtdy.
HOK-nyň baştutany Türkiýede HOK-niň adatdan daşary kömegi olimpiýa gaçybatalga gaznasy we ýerli hyzmatdaşlar tarapyndan berler diýip, aýtdy. Siriýada bolsa ejir çeken etraplara elýeterliligi bolan halkara hökümete degişli däl guramalar we BMG-niň agentlikleri tarapyndan işler geçiriler.
Olimpiýa gaçybatalga gaznasynyň «Sport raýdaşlygyň hatyrasyna» atly maksatnamanyň maliýeleşdirilmeginiň birinji ýylynyň çäklerinde serişdeleri bölüp berendigini belläp geçmelidiris. Maksatnamanyň işjeňligi sporty bosgunlara we gaçybatalga gözleýän adamlara kömek hökmünde ulanylyp, Türkiýede amala aşyrylýar.
ORIENT habarlar
