"Aýratyn garaýyş" – mähir bilen ünslüligiň saglyk çäklendirmeleriniň öwezini dolan pursaty
Halkara maýyplar gününe bagyşlanan çäre 3-nji dekabr, şenbe güni Aşgabatda ýurduň müftüliginiň we Türkiýe Respublikasynyň Medeniýet merkeziniň ýerleşýän binasynda geçirildi.
Bu çäre hökümetiň saglyk mümkinçilikleri çäklendirilen adamlaryň abadançylygy ugrundaky tagallalaryň üstüni dolmaga, jemgyýetçilik durmuşynyň ähli ugurlaryna integrasiýa babatda hakyky mümkinçiliklerini giňeltmäge gönükdirilendir.
Birleşen Milletler Guramasynyň berýän maglumatyna görä, planetamyzyň ýaşaýjylarynyň 15%-ini maýyplar düzýär. Aşgabat çäresini gurnaýjylar maýyplaryň hemmeler bilen deň derejede döredijilik işlerine doly gatnaşmagynyň jemgyýet üçin nä derejede bähbitlidigini görkezmek üçin birleşdiler.
Habarlylygy artdyrmak kampaniýasynyň geçirilen zalynda diňe bir saglygy taýdan ejir çekýänler däl, eýsem olara işjeň kömek we goldaw bermäge taýyn adamlar, şol sanda Türkmenistanda akkreditlenen ilçihanalaryň we halkara guramalaryň, jemgyýetçilik guramalarynyň wekilleri, telekeçiler, meýletinçiler, ýaşlar we başgalar ýygnandylar.
Çärä gatnaşyjylary foýede “Mümkinçilikleriň çägi” atly fotosurat sergisi garşylap, bu ýerde görkezilen eserler özgäniň derdine biparh seretmeýän adamlaryň kömegi we goldawy arkaly mümkinçiligi çäkli gahrymanlaryň durmuşda öz ornuny tapmagy başarandyklary barada gürrüň berýär.
Isleg bildirenler ABŞ-nyň Aşgabatdaky ilçihanasynyň Maglumat çeşmeler merkeziniň ýardamy bilen türkmen we iňlis dillerinde neşir edilen çeper eserleri öz ýanlary bilen alyp gitdiler.
Çäräniň dowamynda eşidişinde kemçilik bolan ýaşlar üçin sosial telekeçilik hakynda film görkezildi, şeýle hem görüş ukybynyň pesligine garamazdan, durmuşynda uly üstünliklere ýetmegi başaran amerikaly professor Stiwen Kuusistonyň ruhlandyryjy häsiýete eýe bolan wideo -ýüzlenmesi görkezildi.
Mümkinçiligi çäkli diýip atlandyryp bolmajak adamlar tarapyndan taýýarlanan "Üstünligiň merdiwany" atly konsert programmasynyň her bir sany çärä gatnaşýanlar tarapyndan uly şowhun bilen garşylandy. Olar höwes bilen goşgy okadylar, aýdym aýtdylar we tomaşaçylaryň işjeň goldawy bilen tans etdiler.
Çäräni guraýjylaryň biri-de, Türkiýe Respublikasynyň diplomatik wekilhanasy bolup, bu dostlukly ýurduň Adatdan daşary we doly ygtyýarly ilçisi Togan Oral ORIENT-e şeýle gürrüň berýär:
– Türkmenistanda mümkinçiligi çäkli adamlar bilen işjeň iş alyp barýan ýurduň jemgyýetçilik guramalary, mysal üçin “Yeňme” jemgyýetçilik guramasy bilen bilelikde şeýle çäreleriň guramaçylyk işlerine gatnaşmagy özümiz üçin uly dereje saýýarys.
– Men "mümkinçiligi çäkli adamlar" diýen söz düzümini halamok, sebäbi olaryň mümkinçilikleri bar. Biz diňe özümiz barada pikir etmek endiginden ýüz öwrüp, daş-töweregimizi gurşap alan dünýäni giň nukdaýnazardan kabul etmelidiris. Biz bu dünýäde beýlekilere görä saglyk taýdan ýagdaýy juda pes bolan adamlaryň bardygyna we olaryň jemgyýete goşant goşmak isleglerinde aýratyn ünse we goldawa mätäçdigine düşünmelidiris, olaryň muny başarjakdygy ikuçsyzdyr.
Munuň diňe Halkara maýyplar gününde däl, her gün - diňe bir öz durmuşyň bilen ýaşaman, eýsem ýagdaýyny ilatyň galan böleginiňki ýaly mümkinçilikleri bolar derejede, beýleki adamlar bilen deň derejede bolup bilmekleri üçin üýtgedip bilmeýänleriň aladalaryny paýlaşyp ýaşamaga çalyşmalydygymyzy belläsim gelýär.
– Meniň pikirimçe, biz ilki bilen öz aňymyzdaky päsgelçilikleri ýok etmeli we daş-töweregimizdäki dünýäni däl-de, özümizi we öz garaýşymyzy üýtgetmelidigimize düşünmäge synanyşmalydyrys. Pikirlerimizi üýtgedenimizde, özümiz ýaly adamlaryň durmuşy, olaryň öwrenmegi we bilim almagy üçin şertleri nädip döredip boljakdygy belli bolar, olar biziň birimiz, diňe aýratyn ideg gerekligi bilen tapawutlanýarlar.
Ýene-de bir gezek gaýtalaýaryn: maýyplar “mümkinçilikleri ýok” ýa-da “çäkli” adamlar däl. Olar diňe aýratyn garaýşa mätäç. Şonuň üçin, ilki bilen "aýratyn gatnaşyk, aýratyn garaýyş" diýen düşünjäniň asyl manysyna göz ýetirmelidiris. Bu çärä gatnaşanlaryň hemmesine - gurnaýjylara we olaryň hyzmatdaşlaryna tüýs ýürekden sag bolsun aýdasym gelýär. Çäräniň ýyly mähir siňdirilip, üns-alada gurşalmagynyň türkmen halkyna mahsus aýratynlykdygyny belläsim gelýär...
...Halkara Maýyplar güni BMG Baş Assambleýasy tarapyndan, laýyk 30 ýyl ozal yglan edilipdi. Bu ýylyň mowzugy: "Inklýuziw ösüş üçin transformasion çözgütler: elýeterli we adalatly dünýäni döretmekde innowasiýalaryň orny".
USAID tarapyndan maliýeleşdirilýän we Winrock International tarapyndan durmuşa geçirilýän “Merkezi Aziýada Howpsuz Migrasiýa” maksatnamasy, ABŞ-nyň ilçihanasynyň Aşgabat maglumat çeşmesi merkezi, Türkiýäniň ilçihanasy, hususy kärhanalar we jemgyýetçilik gurluşlary türkmen paýtagtynda geçirilen bu çäräniň guramaçylary bolup çykyş etdiler.
Бекдурды АМАНСАРЫЕВ
