Türkmenistanyň himiýa senagaty geljegiň maýa goýum taslamalaryny işe girizmäge taýýarlaýar
Türkmenistanyň himiýa senagaty ösdürmegiň strategiýasy ýurdumyzyň çig malyny has doly peýdalanmaga gönükdirilendir – ýurt tebigy gazyň gorlary boýunça dünýäde dördünji orun hem-de gidromenirl çig malyň gorlary boýunça öňdäki orunlary birini eýeleýär: Garabogaz aýlagynyň kristalara we ýerüsti şorlary, şeýle hem ýerasty ýodbromly suwlary bar. Himiýa pudagynyň wezipesi uglewodorod çig malyny ýurdumyzyň hem-de halkara jemgyýetçiliginiň bähbitlerine netijeli peýdalanmakdan ybarat – diýip, Aşgabatdaky nebitgaz maslahatynyň çäklerinde çykyş edip, “Türkmenhimiýa” DK-nyň başlygy Nyýazly Nyýazlyýew gürrüň berdi.
Ol korporasiýanyň işi we soňky ýyllarda ýurdumyzda ýerine ýetirilen, häzirki wagtda durmuşa geçirilýän taslamalar barada giňişleýin syn berdi, şeýle hem işe girirzlimegi ýakyn geljekde göz öňünde tutulan täze meýilnamalar barada gürrüň berdi. Soňky 4 ýylda Türkmenistanda iri himiýa desgalary – Garabogazda ammiak we karbamid öndürýän zawod, Gyýanlyda polimer öndürýän zawod, şeýle hem Owadandepede tebigy gazdan benzin öndürýän zawod ulanylmaga berildi.
Häzirki wagtda gazhimiýa toplumynda taslamalaryň ikinji tapgyry taýýarlanylýar, şolara gatnaşmaga Ýaponiýanyň öňde baryjy kompaniýalarynyň wekillerini çagyrmak meýilleşdirilýär. Gürrüň Garabogazda ammiak we karbmid öndürjek zawod barada barýar – täze kärhana bir ýylda 660 müň tonna ammiak öndürmäge hem-de her ýylda karbamidiň 1,155 million tonnasyny öndürmäge niýetlenendir. Owadandepedäki tebigy gazdan benzin öndürýän zawodyň kuwwatlylygyny bolsa bir ýylda 600 müň tonna benzin öndürmäge çenli artdyrmak maksat edinilýär. Ýeri gelende aýtsak, bu kärhana täsin toplum bolup, bu ýerde tebigy gazy gaýtadan işlemekden Ýewro-5 standarty boýunça talaplara laýyk gelýän ekologiýa taýdan arassa benziniň senagat möçberlerinde dünýäde ilkinji gezek öndürilmegi amala aşyryldy – diýip, Nyýazlyýew belledi.
Ýakyn geljekde tebigy gazy çuňňur gaýtadan işlemek, azot we fosfor dökünlerini, ýodbromly önümleri, kaustik sodany we hlor öndürmek, şeýle hem Garabogaz aýlagynyň gidromineral serişdelerini toplumlaýyn özleşdirmek boýunça birnäçe häzirki zaman maýa goýum taslamalarynyň gurluşygy meýilleşdirilýär – diýip, “Türkmenhimiýa” DK-nyň başlygy çykyşynda gürrüň berdi.
ORIENT news
