Ýewropanyň Täzeleniş we Ösüş Banky türkmen eksportçylary üçin Merkezi Aziýadan mümkin bolan satyn alyjylar bilen onlaýn duşuşyklary gurady
Ýewropanyň Täzeleniş we Ösüş Banky türkmen önüm öndürijileri üçin goňşy ýurtlardan - Gyrgyzystandan, Gazagystandan, Täjigistandan we Özbegistandan mümkin bolan import edijiler bilen onlaýn duşuşygyny gurady.
Duşuşyk Ýewropa Birleşigi tarapyndan maliýeleşdirilýän Türkmenistanda «Kiçi telekeçilige maslahat beriş» maksatnamanyň çäklerinde geçirildi we 2022-nji ýylyň maý aýynda başlanan türkmen eksportyny ösdürmek boýunça çäreleriň bir bölegi bolup durýar.
Onlaýn duşuşygyň maksady ýerli öndürijileriň eksport mümkinçiligini güýçlendirmek, daşary ýurt kärhanalarynyň wekillerini Türkmenistanda öndürilen önümler bilen tanyşdyrmak we türkmen telekeçileriniň gatnaşmagynda eksport-import amallary bilen baglanyşykly meseleleri ara alyp maslahatlaşmakdyr.
Türkmen önümlerini öndürijiler öz kompaniýalarynyň alyp barýan işleri, öndürilen önümleriň hili we öz ulanýan önümçilik tehnologiýalary barada çykyş etdiler, bu tehnologiýalar bolsa köp halatlarda ýokary halkara standartlaryna laýyk gelýär. Çakylyga çagyrylanlaryň arasynda tejribeli eksportçylar we ýakyn wagtda daşary ýurtlara haryt iberip başlamagy meýilleşdirýän firmalar bar.
Türkmen işewürleri bilen hyzmatdaşlyk etmekde tejribesi bolan daşary ýurtly telekeçiler häzirki wagtda Türkmenistanda köp mukdarda önüm öndürip bilýän örän iri kompaniýalaryň işleýändigini aýtdy. Mysal hökmünde Ýewropanyň ösen tehnologiýalaryndan peýdalanyp we ýokary hilli çig malyny ulanyp, ýerli aýakgap öndürijileriň biri getirildi.
Eziz OVEZOW
Redaksiýanyň suraty
