«Merkezi Aziýada sebitleýin ykdysady hyzmatdaşlyk (CAREC)» maksatnamasynyň Milli utgaşdyryjylary 21-nji Ministrler maslahatyna taýýarlygy ara alyp maslahatlaşdylar
Türkmenistanyň Maliýe we ykdysadyýet ministri, «Merkezi Aziýada sebitleýin ykdysady hyzmatdaşlyk (CAREC)» maksatnamasy boýunça Türkmenistandan milli utgaşdyryjy Muhammetgeldi Serdarow «Merkezi Aziýada sebitleýin ykdysady hyzmatdaşlyk (CAREC)» maksatnamasynyň Milli utgaşdyryjylarynyň göni wideoaragatnaşyk arkaly mejlisine gatnaşdy. Onda CAREC maksatnamasynyň 21-nji Ministrler maslahatynda makullamak üçin hödürlenmäge meýilleşdirilýän 2022-nji ýyl boýunça resminamalara seredildi.
Türkmen tarapynda duşuşyga şeýle hem Türkmenistanyň Energetika we Oba hojalyk we daşky gurşawy goramak ministrlikleriniň ýolbaşçylarynyň orunbasarlary gatnaşdylar.
Mälim bolşy ýaly, Ministrler maslahatynda makullamak üçin hödürlenmäge meýilleşdirilýän resminamalaryň hatarynda pandemiýadan soň ýaşyl, durnukly we ähli ugurlary öz içine alýan dikeldiş üçin çarçuwaly maksatnamasy, Merkezi Aziýada sebitleýin ykdysady hyzmatdaşlyk sebitinde oba hojalygy we azyk howpsuzlygy ösdürmek üçin hyzmatdaşlyk çarçuwasy bolar.
Ministrler maslahatynyň çäklerinde şeýle hem CAREC maksatnamasynyň howanyň üýtgemegine garşy göreşmek üçin sebitleýin çärelere goldaw bermek boýunça giňişleýin gözleg işine uly üns berler.
ORIENT news
Surat Türkmenistanyň Maliýe we ykdysadyýet ministrligi tarapyndan berildi
