Türkmen ýokary okuw mekdebi bilim ulgamyndaky durnukly ösüş Başlangyjyna goşulýar
Halkara ynsanperwer ylymlary we ösüş uniwersiteti BMG-niň möhüm düzümleriniň birnäçesi bilen hyzmatdaşlykda işleýän ýokary bilim ulgamyndaky durnukly ösüş boýunça global Başlangyjyna goşuldy – diýip, «Neýtralnyý Turkmenistan» gazeti habar berýär.
Dünýädäki 540-dan gowrak uniwersitetleri we ylmy-barlag edaralaryny bir ýere jemleýän taslama, dünýäde ýüze çykýan düýpli wezipeleri ýerine ýetirmekde innowasion ylmy we intellektual mümkinçilikleri ulanmak nukdaýnazaryndan dürli ýurtlardaky bilim edaralary bilen BMG-niň arasynda ýakyn hyzmatdaşlygy üpjün etmegi maksat edinýär.
Bu Başlangyç ýokary okuw mekdepleri öňdebaryjy tejribäni öwrenmek we paýlaşmak, intellektual jogapkärçiligiň ýeke-täk global medeniýetiniň döremegine goşant goşýan gözleg işleri bilen tanyşmak üçin hyzmatdaşlyk etmekde özboluşly platforma bolup durýar.
Halkara ynsanperwer ylymlary we ösüş uniwersiteti bu abraýly global Başlangyjyň agzasy hökmünde kabul edilen Türkmenistanyň ilkinji ýokary okuw mekdebi boldy, munuň özi uniwersitetiň üstünlikli alyp barýan halkara işlerini, şol sanda degişli ylmy gözlegleri görkezýär, olar halkara maglumatlar binýatlary bilen indeksirlenýän abraýly ýöriteleşdirilen neşirlerde şöhlelendirilýär.
ORIENT news
Surat: yandex.ru
