Türkmenistanyň wekiliýeti Gruziýanyň nebitgaz korporasiýasynda duşuşyk geçirdi
Düzüminde döwlet edaralarynyň we işewür düzümleriň agzalary bolan türkmen wekiliýeti Tbiliside Gruziýanyň nebitgaz korporasiýasynyň baş direktory Georgiý Çikowani bilen duşuşdy.
Gepleşikleriň esasy maksady energetika pudagynda häzirki ýagdaýlary hem-de geljekde gatnaşyk etmegiň meýilnamalaryny ara alyp malahatlaşmakdan ybarat boldy. Garalan meseleleriň hatarynda üstaşyr geçirmek amallaryny ýönekeýleşdirmek we Türkmenistandan iberilýän nebit önümleriniň möçberini artdyrmak, olaryň Gruziýada gaýtadan işlenilmegi hem-de saklanylmagy bilen baglanyşykly düzümleýin taslamalary bilelikde durmuşa geçirmek baaradaky meseleler boldy diýip, Gruzin KHBS ýazýar.
Georgiý Çikowani myhmanlary Gruziýayň nebitgaz korporasiýasynyň gün tertibi bilen tanyşdyrdy, tebigy gazdan öndürilen önümiň söwdasy bilen birlikde, energetika pudagynda hyzmatdaşlygy diwersifikasiýalaşdyrmagyň wajypdygyna üns çekdi.
Taraplar hyzmatdaşlygy dowam etmäge taýýardygyny beýan etdiler hem-de bilelikde işlenilmegini depginli ösdürmegi isleýändiklerini aýtdylar. Duşuşyga Türkmenistanyň Gruziýadaky ilçisi Döwlet Myratow gatnaşdy.
Saparyň çäklerinde Türkmenistanyň wekiliýetiniň agzalary geçen hepde Gruziýanyň DIM-de daşary işler ministriniň orunbasary Aleksandr Hwtisiaşwili bilen hem duşuşyk geçirdi, birnäçe beýleki edaralarda iki ýurduň arasyndaky ykdysady gatnaşyklary çuňlaşdyrmaga we olaryň üstaşyr kuwwatyny netijeli ulanmaga bagyşlanan ikitaraplaýyn gepleşikler boldy.
ORIENT news
