Türkmenistan CICA-ny 2025-nji ýyly “Parahatçylyk we ynanyşmak ýyly” diýip yglan etmek başlangyjyny goldamaga çagyrdy
Astanada Aziýada özara hyzmatdaşlyk we ynamy berkitmek çäreleri boýunça Geňeşiniň (CICA) sammitinde Türkmenistanyň Daşary işler ministri Türkmenistanyň 2025-nji ýyly “Parahatçylyk we ynanyşmak ýyly” diýip yglan etmegi teklip edendigini ýatladyp, CICA ýurtlaryny bu başlangyjy goldamaga çagyrdy.
Mundan başga-da, Türkmenistanyň wekili Aziýa ýurtlaryna hem degişli bolan bosgunlar meselesini çözmegiň zerurlygyna ünsi çekdi. Türkmenistanyň Daşary işler ministriniň sözleri CICA sammitiniň geçişini çap görnüşinde okyjylar köpçüligine ýetiren Gazagystanyň Informburo.kz portalynyň habarynda getirilýär.
Sammitde Gazagystanyň Prezidenti Kasym-Jomart Tokaýew CICA-ny dolyhukukly halkara guramasyna öwürmegi teklip etdi. Aziýada özara hyzmatdaşlyk we ynamy berkitmek çäreleri boýunça Geňeşiniň (CICA) döwlet we hökümet baştutanlary Geňeşi gurama üýtgetmek barada Astana beýannamasyny kabul etdiler.
Türkmenistan 2021-nji ýylyň iýun aýyndan bäri CICA-da synçy statusyna eýedir.
ORIENT news
