"Türkmenistanyň nebiti we gazy – 2022" atly sergi: innowasiýa we hyzmatdaşlyk
26-njy oktýabrda Aşgabatda "Türkmenistanyň nebiti we gazy" XXVII Halkara maslahaty we şol at bilen üç günlük sergi açylar.
"Türkmengaz" we "Türkmennebit" Döwlet konsernleriniň gatnaşmagynda, şeýle hem Türkmenistanyň Söwda-senagat edarasynyň "Türkmen Forum" bilen hyzmatdaşlygynda guraljak bu sergide Türkmenistanyň we dünýäniň nebit-gaz pudagynyň gazananlary, bu pudagy ösdürmek üçin täze pikirler, energiýa göterijileri öndürmek we daşamak, uglewodorod çig mallaryny saklamak babatynda innowasion tehnologiýalar, serwis hyzmatlary, şeýle hem Merkezi Aziýa sebitindäki häzirki we geljekki nebit-gaz taslamalary görkeziler.
"Türkmenistanyň nebiti we gazy – 2022" atly serginiň esasy maksatlaryndan biri milli we halkara nebit kompaniýalarynyň arasyndaky hyzmatdaşlygy giňeltmekdir. Sergi bazaryň ugruny üýtgedýän häzirkizaman tapgyrynda ýangyç we energetika toplumynda özara bähbitli hyzmatdaşlygyň barha artýan ähmiýetine üns çeker.
Sergä 40-dan gowrak daşary ýurt we türkmen kompaniýalary gatnaşar. Nebit we gaz pudagynyň dünýä ägirtleri – Dragon Oil, Petronas, CNPC, TATNEFT, ENI, Schlumberger we başgalar – Türkmenistanyň nebit, gaz, energetika we nebithimiýa pudagyndaky täze maýa goýum taslamalary barada myhmanlary habarly etmek maksady bilen öz stendlerini görkezerler.
Serginiň daşary ýurtly gatnaşyjylary üçin Dubaý-Aşgabat-Dubaý çarter uçuşy guralar, olara wiza goldawy hem berler. Maslahatyň we serginiň çäklerinde Aşgabadyň gözel ýerlerine gezelençler, golf klubyna sapar guralar.
Türkmenistanyň nebit-gaz pudagynyň we B2B-niň ýokary ýolbaşçylary bilen onlaýn we adaty görnüşde ikitaraplaýyn duşuşyklar meýilleşdirilýär.
“Türkmenistanyň nebiti we gazy – 2022” XXVII Halkara sergisiniň ýene bir täzeligi – oňa gatnaşyjylara tebigy baýlyklary çykarýan operatoryň ornunda bolup görmek we wirtual hakykat tehnologiýalaryny ulanmak bilen nebit guýularynyň burawlanyşyna we tebigy gaz ýataklarynyň gözleg işlerine ýakyndan syn etmek mümkinçiligidir.
Sergi barada has giňişleýin maglumat üçin http://expo.ogt-turkmenistan.com/ru resmi saýta giriň ýa-da batyr.d@turkmen-forum.com we tilla.bozaganova@turkmen-forum.com salgy boýunça habarlaşyň.
