Germaniýada allergiýany bejermegiň usuly tapyldy
Paul Erlih institutynyň we Gessen uniwersitetiniň nemes alymlary allergiýany bejermegiň täze usulyny teklip etdiler. Allergiýa ylmy žurnalynyň habar bermegine görä, bejergi rFlaA: Betv1 birleşýän belogyň ulanylmagyna esaslanýar.
Mälim bolşy ýaly, häzirki wagtda dünýä ilatynyň dörtden birine çenli allergiýanyň köp görnüşlerinden ejir çekýär. Ondan öň lukmançylyk allergiýanyň diňe alamatlaryny bejermegi teklip edýärdi. Emma soňky ýyllarda alymlar allergiýanyň netijelerini däl-de, sebäbini ýok etmek üçin döredilen täze çemeleşmeleri işläp düzýärler.
Germaniýaly ylmy gözlegçiler berýoza tozanjyklarynyň allergeninden bolan belogy Bet v 1-den we Listeria monositogen bakteriýasyndan flagella belogy rFlaA sintez etdiler. Laboratoriýa synaglary munuň öýjükleriň aşa allergiki täsirini basyp ýatyrýan IL-10 maddasynyň önümçiliginiň ýokarlanmagyna sebäp bolýandygyny görkezdi.
Ylmy gözlegçiler, allergen saklaýan rFlaA: Betv1 belogynyň B öýjüklerine, immun ulgamynyň aýratyn öýjüklerine ýetirýän täsirini seljerenden soň, B öýjükleriniň kadalaşdyryjy öýjüklere bölünýändigini anykladylar. Bu açyşyň ähmiýeti, kadalaşdyryjy öýjükleriň allergiki täsire getirmeýän antikorlary we interleukinleri öndürmegidir.
Şeýlelik bilen, bu ylmy işiň awtorlary gibrid belogyň berýoza tozanjyklarynyň allergiýasynyň ýagdaýyny hakykatdanam ýeňilleşdirip biljekdigi barada netijä geldiler.
ORIENT news
Surat: sechenov.ru
