Aşgabat bilen Kabul TAPI gaz geçirijisi barada möhüm ylalaşyklary gazandylar
Owganystanyň Daşary işler ministrligi bu ýurduň Türkmenistana sapar bilen gelen wekiliýetiniň gurluşygy alnyp barylýan Türkmenistan-Owganystan-Pakistan-Hindistan (TAPI) gaz geçirijisi bilen baglanyşykly möhüm meseleler boýunça ylalaşyklaryň gazanandyklaryny habar berýär.
Owganystanyň Daşary işler ministrliginiň metbugat sekretary Şafai Azamyň sözlerine görä, taraplar gaz geçirijisiniň gurluşygy, senagat önümçiliklerine we Hyratyň ýaşaýjylaryna gaz bermek, şeýle hem tebigy gazy suwuklandyrylan uglewodorod gazyna (alternatiw ýangyja) öwürmek boýunça hereket etmegiň meýilnamalary hakynda ylalaşyk gazandylar.
Owganystanyň Ykdysady ösüş ministrliginde hem TAPI barada beýanat bilen çykyş etdiler.
«TAPI taslamasy syýasy gatnaşyklara, sebit hyzmatdaşlygyna we sebitleýin ösüşe goşant goşup biljek möhüm we düýpli taslamalaryň biri bolup durýar» - diýip, ýurduň Ykdysady ösüş ministrliginiň wekili Abdul Rahman Habib muny şeýle teswirledi.
Türkmen gazyny Owganystana we Günorta Aziýa ýurtlaryna eltmek üçin gurulýan TAPI gaz geçirijisiniň taslamasy soňky döwürde möhüm ähmiýete eýe boldy. Bu gyşyň öňüsyrasynda dünýä nebit we gaz bazaryndaky çylşyrymly ýagdaý bilen baglanyşyklydyr.
Suwuklandyrylan tebigy gazyň bazaryndaky häzirki ýagdaý Aziýanyň ösýän ýurtlaryna uzak möhletleýin şertnamalar boýunça turbageçiriji arkaly gaz bilen üpjün etmegiň iň peýdalysydygyny görkezýär. Türkmenistan Günorta Aziýadaky hyzmatdaşlaryna hut şuny hödürleýär we gaz geçirijisi gurlan halatynda, bu TAPI gaz geçirijisi tarapyndan üpjün edilip bilner.
Nury AMANOW
Surat: business.com.tm
