Türkmenistanyň we Gazagystanyň Daşary işler ministrlikleriniň wise-ministrleri Nur-Soltanda geçiriljek sammiti ara alyp maslahatlaşdylar
Nur-Soltanda Türkmenistan bilen Gazagystanyň Daşary işler ministrleriniň orunbasarlarynyň arasynda gepleşikler geçirildi. Berdinyýaz Mätiýew we Ýermuhambet Konuspaýew ikitaraplaýyn gün tertibindäki möhüm meseleleri ara alyp maslahatlaşdylar we ýurtlaryň syýasat, ykdysadyýet, söwda, diplomatiýa we medeni-gumanitar ugurlarda özara peýdaly hyzmatdaşlygy giňeltmäge taýýardyklaryny tassykladylar.
Wise-ministrler BMG-nyň, GDA-nyň, Ykdysady hyzmatdaşlyk gyramasynyň, Yslam hyzmatdaşlygy guramasynyň we beýleki halkara guramalarynyň çäginde Türkmenistan bilen Gazagystanyň arasyndaky hyzmatdaşlygyň oňyn tejribesini bellediler.
Döwletara gatnaşyklary ösdürmekde iň ýokary we ýokary derejelerde özara saparlaryň orny bellendi. Şeýle hem, 2021-2023-nji ýyllar üçin Daşary işler ministrlikleriniň arasyndaky hyzmatdaşlyk meýilnamasyna laýyklykda, Türkmenistanyň we Gazagystanyň Daşary işler ministrlikleriniň derejesinde hyzmatdaşlygyň şertnama-hukuk esaslaryny kämilleşdirmek we syýasy geňeşmeleri guramak barada söhbet edildi.
Taraplar Gazagystan Respublikasynyň Prezidenti Kasym-Jomart Tokaýewiň 2021-nji ýylyň oktýabr aýynda Türkmenistana eden döwlet saparynyň netijesinde gazanylan ylalaşyklaryň ýerine ýetirilmegine, şeýle hem türkmen tarapynyň 2022-nji ýylyň oktýabr aýynda Gazagystanyň paýtagtynda geçiriljek halkara çärelerine, ýagny Aziýada özara hyzmatdaşlyk we ynamy berkitmek çäreleri boýunça Geňeşiň (CICA) we GDA we MA-RF sammitlerine gatnaşmagyna taýýarlyk görmek meselelerine aýratyn üns berdiler.
Türkmenistanyň Daşary işler ministrliginiň habaryna görä, diplomatlar ylym-bilim ulgamyndaky gatnaşyklary giňeltmek, lukmançylyk we saglygy goraýyş pudagynda hyzmatdaşlygy işjeňleşdirmek mümkinçiliklerini ara alyp maslahatlaşdylar.
ORIENT news
