Türkmenistanyň gurluşyk, senagat we energetika pudaklary halkara sergisinde
Aşgabatda "Türkmenistanyň gurluşygy, senagaty we energetikasy – 2022" atly halkara sergisi öz işine başlady, oňa 120-ä golaý döwlet we hususy kärhanalarynyň, ylmy edaralaryň we daşary ýurt kompaniýalarynyň wekilleri gatnaşýar.
Şeýle sergi Türkmenistanda ilkinji gezek geçirilýär we geçen ýyl döredilen täze hünär baýramçylygy – Gurluşyk we senagat toplumynyň işgärleriniň gününe bagyşlanýar. Bu çäre gurluşyk-binagärlik, energetika pudagynyň, senagat-gurluşyk ulgamynyň we himiýa pudagynyň hünärmenlerini birleşdirýär.
Täze sergi we bu mynasybetli geçirilýän “Türkmenistanyň gurluşyk, senagat, energetika pudaklarynyň ösüşi” atly ylmy-amaly maslahat şu ýyl kabul edilen sosial-ykdysady ösüşiň ýedi ýyllyk Prezident maksatnamasynyň çäginde aýratyn ähmiýete eýedir.
Bu strategik resminamanyň esasy ugurlarynyň biri Türkmenistanda häzirkizaman senagat kärhanalaryny döretmek, täze desgalaryň we ýaşaýyş jaýlarynyň gurulmagy, şeýle hem elektrik energiýasynyň öndürilişini ýokarlandyrmakdyr. Bularyň hemmesi 30 müňe çenli täze iş ýerlerini döretmäge we jemi içerki önümiň ösüş depginini 6,7% derejesinde saklamaga ýardam etmelidir.
Sergi ýurtda eýýäm hereket edýän iri senagat desgalarynyň gazananlary bilen tanyşdyrýar, bu kärhanalaryň öndürýän önümlerine içerki we halkara bazarlarda uly isleg bildirilýär. Olaryň arasynda Giýanlydaky polimer zawody, Ahal welaýatyndaky tebigy gazdan benzin öndürýän zawod, “Türkmen aýna önumleri” kärhanasy we başgalar bar.
Uly göwrümli stend bitewi gurluşyk-senagatyny we energetika toplumyny emele getirýän "Türkmenenergo" döwlet korporasiýasyna, "Türkmenhimiýa" döwlet konsernine, Türkmenistanyň Gurluşyk we binagärlik ministrligine, şeýle hem Türkmenistanyň Senagat we gurluşyk önümçiligi ministrligine bagyşlanýar.
Sergä gatnaşýanlaryň arasynda gurluşyk materallarynyň, senagat we sarp edijilik önümleriniň önümçiligi bilen meşgullanýan we iri gurluşyk taslamalaryna işjeň gatnaşýan türkmen hususy kärhanalarynyň sanynyň köplügi ýurtda telekeçiligiň işjeň ösýändigini görkezýär.
Eziz ÖWEZOW
