Awaza dynç aljak has köp adamlary kabul edip biler – täze kottejler toplumy açyldy
Türkmenistanyň Prezidenti Serdar Berdimuhamedow duşenbe güni, zähmet rugsadynyň ilkinji gününde Awazada nobatdaky kottejler toplumynyň açylyş dabarasyna gatnaşdy.
Hazaryň deňiz şypahanasynda maşgala bolup dynç almaga niýetlenilen, “Rowaç” diýilip atlandyrylan täze merkez iki gatly öýleriň 48-sini özünde jemleýär. Taslamasynyň oňaýly meýilleşdirilmegi netijesinde, olaryň her birinde maşgalalaryň birnäçesi we umuman, 900-e çenli adam ýerleşip biler.
Serdar Berdimuhamedow toplumyň çäklerini gözden geçirdi, kottejlere baryp gördi, şolarda maşgala bolup dynç almak üçin ähli amatlyklar göz öňünde tutulypdyr. Öýleriň her birinde mebeller bilen üpjün edilen ýatylýan hem-de myhman otaglary, degişli enjamlar ornaşdyrylan aşhana bar. Dynç alýanlar isleglerine görä, bu aşhanada nahar taýýarlap bilerler.
Bu ýerde dynç alýanlar üçin SPA merkezi, restoran, karaoke-bar göz öňünde tutulan, açyk howada wagt geçirmek üçin bolsa – sport we çagalar üçin oýun meýdançalary, üsti açyk suwda ýüzülýän howuz bar. Ýöne, esasy özüne çekiji – elbetde, deňizdir.
Şeýle hem döwlet Baştutany Hazaryň kenary boýunça gezelenç edip, bu ýerleriniň gurnalyşy hem-de dynç alýanlara, şol sanda sport bilen meşgullanmak üçin bu ýerde döredilen şertler bilen tanyşdy.
ORIENT news
