TDHÇMB-niň söwdalary: dizel ýangyjyny eksport etmäge $3 million gowrak geleşikler baglaşyldy
Sişenbe güni, 26-njy iýulda Türkmenistanyň Döwlet haryt-çig mal biržasynyň söwdalarynda umumy bahasy $3,5 million bolan 6 geleşik baglaşyldy diýip, ORIENT-iň habarçysy habar berýär.
Owganystanyň wekilleri 3 müň tonna gidro usulda arassalanan dizel ýangyjyny satyn almaga geleşikleri baglaşdylar, onuň bahasy soňky söwdalardaky bilen deňeşdirilende 2,7% arzanlady we bir tonnasynyň bahasy $1 143 deň boldy. Dizel ýangyjy boýunça geleşikleriň umumy bahasy $3,4 million geçdi.
Gyrgyzystandan gelen telekeçi söwdalarda Türkmenistanyň Dokma ministrliginiň kärhanalarynda öndürilen tekiz reňklenen we žakkard tüýjümek önümlerini satyn aldy. Geleşigiň umumy bahasy $149 müň barabar boldy.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
