Türkmenistanda itleri goramak üçin kanun kabul edildi
Türkmenistanda tohum itleriň genofonduny gorap saklamaga gönükdirilen we itler köpeldilen, ösdürilip ýetişdirilen, ulanylan mahalynda ýüze çykýan gatnaşyklary düzgünleşdirýän “Itçilik we kinologiýa işi hakynda” Kanuny çap etdi we güýje girdi.
Resminamanyň esasy maksady itçilikde seçgi-tohumçylyk işini gowulandyrmak, milli genofonda girýän itleriň tohum arassalygyny gorap saklamak, itleriň tohumlaryny köpeltmek hem-de kämilleşdirmek üçin hukuk kepilliklerini döretmek ýoly bilen itçiligi we kinologiýa işini ösdürmek bolup durýar.
Kanunda itlere, şol sanda eýesiz itlere bolan gatnaşyklaryň düzgünlerine uly üns berilýär. Şeýlelik bilen, resminamada göz öňünde tutulan aýratyn ýagdaýlardan başga ýagdaýda itleri gözegçiliksiz goýmak we ýok etmek gadagandyr.
Şertli gözegçilik astyndaky itleri we eýesiz itleri tutmak diňe ýerli ýerine ýetiriji häkimiýetleriň karary bilen döredilen ýörite toparlar tarapyndan mümkindir. Şeýle toparlar, haýwanlarda patologiki häsiýet alamatlary bar bolsa we adamlar üçin howply bolsa ýa-da agyr kesel bolsa, itleri agyrysyz ýok etmek üçin tutup bilerler. Beýleki ýagdaýlarda ýabanylaşan itleriň sanyna gözegçilik etmek maksady bilen sterilizasiýa üçin tutulyp bilner.
Saklawhana düşen itler ol ýerde üç aýdan gowrak saklanylan ýagdaýynda, agyr ýaralanyp ejir çekýän bolsa ýa-da bejerilmesiz kesele duçar bolan ýagdaýynda agyrysyz ýok edilip bilner.
Kanun itleri öldürmek we tutmak üçin adamkärçiliksiz usullaryň, şol sanda zäher we duzak (gapan) ulanylmagyny gadagan edýär. It eýeleri zalym çemeleşmesi üçin kazyýetiň karary bilen olara eýeçilik hukugyny ýitirip bilerler.
Şeýle hem, bu resminama türkmen alabaý itleriniň genofonduny goramak we olaryň baş sanyny artdyrmak, sergileri, sport ýaryşlaryny we synag bäsleşiklerini gurnamak ýaly, “Türkmen alabaý itleri” Halkara assosiasiýasynyň esasy maksatlaryny we wezipelerini tassyklaýar.
Kanunçylyga laýyklykda, Türkmenistanda raýatlar tarapyndan tohum itleri goramak, itşynaslaryň tohum itleri bilen tohumçylyk işlerini alyp barmak we kinologiýa işini amala aşyrmak üçin kinoligik klublary döredilip bilner.
ORIENT news
