Aşgabatda GE tehnologiýalary esasynda Merkezi Aziýada ilkinji Energetika enjamlaryny abatlaýyş we hyzmat ediş merkezi açyldy
Çarşenbe güni hormatly Prezidentimiz Serdar Berdimuhamedow Aşgabatda gurlan energetika enjamlaryna hyzmat etmäge niýetlenilen täze senagat desgasyna baryp, Merkezi Aziýada şunuň ýaly ilkinji desganyň işe giriziliş dabarasyna gatnaşdy.
Büzmeýin etrabynda ýerleşen hyzmat ediş merkezi elektrik stansiýalardaky we Genaral Elektric-iň gaz turbinalary bilen birlikde, ýurdumyzyň energiýa ulgamynyň beýleki edaralarynda işleýän enjamlary hem-de abzallary hil derejesinde, ýokary tehnologiýa taýdan hyzmat etmäge we düýpli abatlamaga mümkinçilik berer.
Serdar Berdimuhamedow Merkeziň açylmagy mynasybetli dabaraly çärede çykyş edip, Türkmenistanyň ähli welaýatlarynda täze, döwrebap elektrik stansiýalarynyň birnäçesiniň işleýändigini, energetika pudagynda beýleki iri taslamalaryň durmuşa geçirilmeginiň dowam edýändigini, içerki energetika halkasynyň hem-de Türkmenistan — Owganystan — Pakistan elektrik geçiriji ulgamynyň gurluşygynyň alnyp barylýandygyny, türkmen elektrik energiýasynyň öndürilişniň möçberiniň artdyrylýandygyny hem-de onuň eksporta diwersifikasiýa ugurlarynyň geriminiň giňeldilýändigini belledi.
Şoňa görä-de, Hyzmat ediş merkezi pudak üçin örän ähmiýetlidir, enjamlary daşary ýurtlara ibermek zerurlygy aradan aýrylyp, olary bejermek boýunça hyzmatlara sarp edilýän wagty hem-de serişdeleri azaltmaga mümkinçilik berer, bu ugurda Diýarymyzyň ýokary derejeli hünärmenlerini taýýarlamak üçin şertleri döreder.
Çalik Enerji türk kompaniýasy tarapyndan gurlan Merkez ekologiýa talaplaryna hem laýyk gelýär, bu ýerde General Electric amerikan kompaniýasynyň öňdebaryjy tehnologiýalary ornaşdyryldy.Täze kärhanada 120-den gowrak işgärler zähmet çeker, olar ukyp-başarnyklaryny artdyrmak üçin öňünden daşary ýurtlarda okuw geçdiler.
Dabarada şeýle hem Çalik Holding-iň ýolbaşçysy Ahmet Çalyk çykyş edip, Aşgabatda gurlan täze Energetika enjamlaryna hyzmat ediş merkeziniň dünýäde şunuň ýaly desgalaryň arasynda enjamlaşdyrylyşy boýunça iň häzirki zaman derejesindedigini nygtady.
Dabara General Electric-iň Ýewropadaky bölüminiň ýolbaşçysy Bris Raýzin gatnaşyp, täze önümçilik toplumyna “General Electric” kompaniýasynyň tehnologiýalaryny ulanmaga rugsat berilýändigi barada güwänamanyň gowşurylandygyny yglan etdi.
The London Energy Club britan kompaniýasyndan onuň wekili tarapyndan Aşgabatdaky täze kärhananyň öňdebaryjy inženerçilik desgasydygyny we Merkezi Aziýada şu ugurdaky ýeke-täk hyzmat ediş merkezidigini tassyklaýan güwänama gowşuryldy.
Germaniýanyň “Fraunhofer” adyndaky Energiýa ykdysadyýeti we energiýa ulgamlary tehnologiýasy institutyndan täze merkezde durnukly we öňdebaryjy tehnologiýalaryň ornaşdyrylandygy baradaky güwänama gowşuryldy.
Güwänamalaşdyrmak hem-de baha bermek boýunça halkara guramasynyň önümleriň howpsuzlygyny üpjün etmek boýunça gözegçiligi amala aşyrýan Awstriýadaky şahamçasy bolsa Aşgabatdaky Energetika enjamlaryny abatlaýyş we hyzmat ediş merkeziniň ýokary hilli we talabalaýyk gurlandygy baradaky güwänamasyny gowşurdy.
Merkez esasy alyp barýan ugry “ömür we lukmançylyk baradaky ylym” hasaplanýan dünýädäki iň abraýly ýokary okuw mekdepleriniň biri bolan Germaniýanyň “Duisburg-Essen” uniwersitetinden ekologik taýdan arassa we daşky gurşawa zyýan ýetirmeýän desga hökmünde ýene-de bir güwänama mynasyp boldy.
Türkmenistanyň Prerzidenti täze kärhananyň önümçilik bölümlerine aýlanyp, olaryň birnäçesini gözden geçirdi hem-de innowasion enjamlar, programma üpjünçiligi bolan tehnikalar we beýlekiler bilen tanyşdy. Bu ýerde intellektual amallary ýerine ýetirmek üçin FANUC atly senagat roboty hem bar.
ORIENT news
