TDHÇMB-niň söwdalary: Awtoulaglara niýetlenilen A-95 görnüşli benzin eksporta satyldy
Anna güni 15-nji iýulda Türkmenistanyň Döwlet haryt-çig mal biržasynyň söwdalarynda umumy bahasy $24,9 million hem-de 675 müň manatlyk 22 geleşik baglaşyldy diýip, ORIENT-iň habarçysy habar berýär.
Türkiýäniň we Owganystanyň wekilleri jemi 15 müň tonna A-95 görnüşli awtoulag üçin niýetlenilen benzini satyn aldylar, söwdalarda bu önümiň iň ýokary bahasy $1 037,50 deň boldy. Haryt boýunça geleşikleriň umumy bahasy $12,7 million barabar boldy.
Ýokarda agzalan ýurtlaryň wekileri КО-20 görnüşli yşykylandyryjy kerosiniň 10 müň tonnasyny satyn almaga hem şertnama baglaşdylar. Nebit önüminiň bir tonnasynyň bahasy $968,75, geleşikleriň umumy bahasy bolsa $9,6 milliona deň boldy.
“Oba hojalygy” boýunça söwdalarda Türkiýeden gelen işewür umumy bahasy $10,5 müň bolan buýanyň arassalanmadyk guradylan köküniň 21 müň tonnasyny satyn aldy.
Tekiz reňklenen we žakkard tüýjümek önümlerini Gyrgyzystanyň wekilleri $356,9 müň satyn aldylar, BAE-niň işewüri bolsa $204 müň nah ýüplügi almaga şertnama baglaşdy. Ýerli telekeçi 675 müň manatlyk nah ýüplük satyn aldy.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
