Türkmen wekiliýeti Şweýsariýada dünýä maliýe düzümleri bilen gepleşikleri geçirdi
Şweýsariýanyň Bad Ragaz şäherinde 3-nji iýuldan 6-njy iýul aralygynda Bütindünýa Bankyna we Halkara Walýuta Gaznasyna wekilçilik edýän toparyň döredilmeginiň 30 ýyllygy mynasybetli ony esaslandyryjy ýurtlaryň (Azerbaýjan, Gyrgyzystan, Gazagystan, Polşa, Serbiýa, Täjigistan, Türkmenistan, Özbegistan, Şweýsariýa Konfederasiýasy) wekilleriniň duşuşygy geçirilýär.
Türkmen wekiliýetiniň düzüminde hökümetiň, Maliýe we ykdysadyýet ministrliginiň we Merkezi bankyň wekilleri bar.
Bu çäräniň çäginde türkmen tarapy Bütindünýä bankynyň wise-prezidenti, Halkara walýuta gaznasynyň dolandyryjy müdiri, Şweýsariýanyň Maliýe ministri we Şweýsariýanyň Merkezi bankynyň başlygy bilen duşuşdy.
Şeýlelikde, Bütindünýä bankynyň wise-prezidenti Anna Býerde bilen geçirilen duşuşykda Türkmenistanyň Saglygy goraýyş we derman senagaty ministrligi bilen durmuşa geçirilýän “Covıd-19-a jogap” taslamasynyň durmuşa geçirilmegi bilen baglanyşykly meseleler ara alnyp maslahatlaşyldy. Bütindünýä banky taslamany durmuşa geçirmegiň kanagatlanarly ösüş depginini belläp geçdi, häzirki wagtda geçirilen karz pul serişdeleriniň ilkinji böleginiň 70% -i eýýäm özleşdirildi.
BB-nyň wise-prezidenti bu karz boýunça göterimleriň öz wagtynda tölenýändigini hem belläp geçdi. Býerde Bütindünýä bankynyň Türkmenistanyň Saglygy goraýyş we derman senagaty ministrligi üçin reagentleri, derman serişdelerini mundan beýläk-de satyn almak boýunça işlerini dowam etdirmäge taýýardygyny aýtdy.
Duşuşykda miwe we gök önüm öndürmek boýunça taslamanyň ikinji tapgyryna girişmegiň zerurdygy bellenildi. Türkmenistan bilen ulag aragatnaşygynyň başlamagy bilen, Bütindünýä bankynyň hünärmenlerini Türkmenistanda miwe we gök önüm öndürýän pudagyň ýagdaýy bilen tanyşdyrmaga mümkinçilik döredi, bu bolsa öz gezeginde taslamanyň durmuşa geçirilmeginde täze güýç bolup hyzmat eder.
BB-nyň wekilleri bilen geçirilen duşuşykda Türkmenistana Bütindünýä Söwda Guramasyna goşulmaga, şol sanda daşary ykdysady ulgamda we daşary ýurt maýa goýumlary babatynda kanunçylygy kämilleşdirmäge ýardam bermäge Bütindünýä bankynyň taýýardygy mälim edildi.
Şeýle hem, BB-nyň wekilleri tarapyndan Türkmenistanyň energiýa pudagy we sebitde energiýa taslamalaryny durmuşa geçirmegiň mümkinçilikleri boýunça seljerme işlerini geçirmek teklip edildi.
Şweýsariýanyň Merkezi bankynyň başlygy Tomas Yordan bilen geçirilen duşuşykda kiberhowpsuzlyk we bank pudagynda maliýe tehnologiýalaryny ulanmak boýunça hyzmatdaşlyk meseleleri ara alnyp maslahatlaşyldy. Şweýsariýa tarapy şu ýylyň 15-16-njy noýabrynda Sýurihde şu meselelere bagyşlanyp geçiriljek okuw maslahatyna gatnaşmagy we hyzmatdaşlygyň geljek üçin meýilnamasyny has jikme-jik işläp düzmegi teklip etdi.
HWG-nyň dolandyryjy müdiri Kristina Georgiýewa we HWG-nyň Ýakyn Gündogar we Merkezi Aziýa bölüminiň başlygy Jihad Azur bilen bolan duşuşykda häzirki wagtda esasy meseläniň dünýädäki ykdysady ösüşiň haýallamagyna täsir edýän inflýasiýa bolup durýandygy bellenildi. Ykdysady statistika, sanlaşdyrma, azyk howpsuzlygy we energiýa pudagyny diwersifikasiýalaşdyrmak ýaly ykdysady özgertmeleri durmuşa geçirmäge hem üns berildi.
Howanyň üýtgemegi babatynda ulgam emele getiriji çäreleriň durmuşa geçirilmegi möhüm ugur hökmünde bellenildi. Türkmenistan Pariž şertnamasy boýunça çäreleri durmuşa geçirýär, bu möhüm işi dowam etdirmeli, bu ugurda HWG dürli ugurlarda, şol sanda Gazagystanyň Halkara pul gaznasynyň sebit merkeziniň üsti bilen tehniki kömegi bermäge taýýardyr.
Şweýsariýanyň Maliýe ministri Uli Maurer bilen geçirilen duşuşykda 2016-njy ýylda gol çekilen Hyzmatdaşlyk hakyndaky Memorandumyň durmuşa geçirilmegi bilen baglanyşykly meseleler ara alnyp maslahatlaşyldy. Taraplar FATF (Maliýe gözegçiligi boýunça hökümetara topar) platformasynda özara gatnaşyk, Türkmenistanyň BSG-na girmegine ýardam bermek ýaly we ş.m. meseleleri çözmek barada ylalaşdylar.
ORIENT news
