Türkmenistanda ilkinji Go Viral festiwaly geçirildi
Aşgabat ilkinji innowasion Go Viral festiwalyny kabul etdi, festiwal köpçülikleýin habar beriş, işewürlik we medeniýet ulgamlarynda höwesjeňleriň hem-de bilermenleriň adybir jemgyýetçiligini özünde birleşdirýär.
Çäre sebitiň beýleki şäherlerinde – Duşenbede, Daşkentde, Bişkekde we Almatyda eýýäm geçirilen sebitleýin festiwallarynyň tapgyrlarynyň dowamy boldy.
“Gözlemek. Oýlap tapmak. Çözmek” şygary bilen ruhlanan täzeçillikçiler we telekeçiler “Ýyldyz” myhmanhanasynda jemlendiler hem-de bu ýerde köpçülikleýin habar beriş we medeniýet ulgamlarynda we IT-tehnologiýalarda ýokary hünär derejeli meseleleri ara alyp maslahatlaşdylar.
Go Viral festiwaly başarjaň we dörediji ýaşlara Türkmenistanda öz hünär derejesindäki tejribelerini paýlaşmaga, dürli ugurlar boýunça bilermenlere gyzyklandyrýan sowallaryny bermäge hem-de peýdaly täze adamlar bilen tanyşmaga kömek etdi.
Mejlis başlanmazdan öňürti, oňa gatnaşyjylar ýörite tagtaň ýüzünde pikir-maksatlaryny amala aşyrmak ugrunda pikirdeşlerini gözleýänler, iş gözleýänler ýa-da iş hödürleýänler we beýlekiler üçin salgynamalaryny we özleri barada maglumatlary goýup bildiler.
– Şu ýyl biz ýurdumyzda köpçülikleýin habar beriş serişdeleri, IT-tehnologiýalar we işewürlik uglamlarynyň wekilleriniň tanyşmagyna hem-de birek-biregi ýakyndan tanamaga mümkinçilik almaklaryna aýratyn üns berdik. Şeýle etmek bilen biz hünärine ussat täze adamlary birleşdirýän jemgyýetçiligiň döremegine, döredijilik adamlaryň hyzmatdaşlyk etmegine ýardam bermek isleýäris – diýip, Go Viral-yň Türkmenistandaky ilçisi Batyr Berdiýew gürrüň berdi.
ABŞ-nyň Türkmenistandaky ilçisi Mettýu Klimou açylyş dabarasynda festiwalyň döreýşiniň taryhy barada biraz gürrüň berdi:
– Ilkibaşdan Go Viral meniň hem-de maşgalamyň önüp-ösen ýerimiz bolan Tehas ştatynyň Ostin şäherinde geçirilen South by Southwest festiwalyndan gözbaş aldy. Şu günki çärä gatnaşýanlaryň ählisi – Siz täzeçillik bilen çemeleşijilersiňiz, bu festiwalyň Türkmenistanda mundan beýläk nähili ösdürlmelidigini siziň özüňiz kesgitlemelisiňiz.
Soňra mejlisiň çäklerinde umumy maslahatlaşmalar, ussatlyk sapaklary, tanyşdyrmalar geçirildi, şolarda olara gatnaşyjylar Türkmenistanda kontentiň, IT-önümleriniň, wideo, foto we şekillendirmeleriň döredilmegi bilen baglanyşykly ýagdaýlary ara alyp maslahatlaşdylar.
Käbir duşuşyklar ýokary hünär derejesinde ykjam wideoşekilleriň düşürilmegine, sanly gurallaryň kömegi bilen işleriň öňe ilerledilmegine, wideoönümçilik hem-de elektron täjirçilik ulgamynda toparlaýyn netijeli işleriň guralmagyna bagyşlandy.
ORIENT news
