Türkmenistan daşary ýurtly ýük daşaýjylara täze ugur boýunça üstaşyr geçmäge rugsat berdi
25-nji iýundan Türkmenistan daşary ýurtly ýük daşaýjylara “Lütfabad (Eýran) – Artyk (Türkmenistan)” barlag geçiriş nokadynyň (BGN) – “Farap – (Türkmenistan) – Alat (Özbegistan)” BGN – “Artyk (Türkmenistan) – Lütfabad (Eýran)” BGN-larynyň ugry boýunça sürüjileri bilen üstaşyr geçmäge rugsat berdi.
Türkmenistanyň döwlet serhetiniň geçiş nokadyna girilende, daşary ýurtly sürüjiler:
– üstaşyr geçmegiň amallaryny resmileşdirmek üçin zerur bolan hemme resminamalary görkezmäge,
– ulag serişdesini zyýansyzlandyryş taýdan işlemegiň tassyklanan çäresini geçmäge,
– COVID-19-a tizleşdirilen barlagy geçip, onuň netijeleri boýunça üstaşyr geçmäge rugsat almaga borçlydyrlar.
Sürüjileriň ýanynda şeýle hem:
– COVID-19-a garşy sanjym edilendigi baradaky resminama (soňky sanjymdan soň, 42 günden köp wagt geçmeli däl),
– COVID-19-a garşy bedeniň durnuklylygynyň bardygyny tassyklaýan resminama,
– COVID-19-a tabşyrylan testiň geçirilendigi barada güwanama (onuň berlenden bäri geçen wagt 72 sagatdan köp bolmadyk möhletli) bolmalydyr.
Ýokarda agzalan resminamalaryň bolmagy daşary ýurtly sürüjilere karantin gözegçiliginde bolmazdan, Türkmenistandan üstaşyr geçmäge mümkinçilik berer.
Ýurtdan üstaşyr geçmek ulag kerweniniň düzüminde galtaşyksyz esasda günüň ýagty wagtynda 08:00-dan başlap, ýol polisiýasynyň ugratmagynda amala aşyrylýar.
Ulag serişdeleriniň barýan ýolunyň ugrunda dynç almak, zerur bolsa bejeriş işlerini geçirmek, ulaga ýangyç guýmak, azyk önümlerini satyn almak üçin ýörite awtoduralgalar göz öňünde tutulýar
Ozal şunuň ýaly şertlerde Türkmenistan ýük daşaýjylara “Sarahs (Eýran – Sarahs (Türkmenistan)” BGN – “Farap (Türkmenistan) – Alat (Özbegistan)” BGN – “Sarahs (Türkmenistan) – Sarahs (Eýran)” BGN-larynyň ugry boýunça ýurduň üstünden geçip gitmäge rusgat beripdi.
ORIENT news
