Aşgabat halkara transport forumyny geçirer
18-19-njy iýulda Aşgabatda ulag-üstaşyr geçelgelerini ösdürmäge we olaryň özara baglanyşygyna bagyşlanan halkara maslahaty geçiriler. Bu barada ORIENT-e Türkmenistanyň MK-niň ýanyndaky Ulag we kommunikasiýalar agentliginde habar berdiler.
Maslahatyň maksady halkara ýük gatnawlarynyň pandemiýadan soň dikeldilmegi we olaryň häzirki ýagdaýa uýgunlaşmagy, ulag-üstaşyr geçelgeleriniň mundan beýläk-de ösdürilmegi, şeýle hem, Türkmenistanyň döwlet düzümleriniň we halkara guramalaryň, iri logistik kompaniýalaryň arasyndaky hyzmatdaşlygy berkitmek baradaky möhüm meseleleri ara alyp maslahatlaşmakdan ybarat.
Maslahata we onuň çäklerinde guralýan işewürlik ýygnaklaryna gatnaşmak halkara ýük gatnawlarynda maýa goýum mümkinçiliklerine has ýakyndan göz aýlamaga we uzakmöhletleýin özara bähbitli hyzmatdaşlygyň geljegini gözden geçirmäge mümkinçilik berer.
Halkara forumyň işine Türkmenistanyň hökümetiniň wekilleriniň, milli we halkara transport kompaniýalarynyň, logistika guramalarynyň we maliýe institutlarynyň ýolbaşçylarynyň gatnaşmagy meýilleşdirilýär.
Şeýle hem, maslahaty gurnaýjylar oňa Zoom Professional platformasynda onlaýn görnüşde gatnaşmak mümkinçiligini göz öňünde tutýarlar.
ORIENT news
