Ahalyň täze dolandyryş merkezinde 5,5 müň adamlyk metjit gurular
– Milli Geňeşiň Halk Maslahatynyň Başlygy Gurbanguly Berdimuhamedow Ahalyň täze dolandyryş merkezinde döwrebap metjidi gurmak baradaky teklibi makullady – diýip, resmi türkmen metbugaty ýazýar.
– Metjit birbada 5,5 müň adamyň namaza durmagyna mümkinçilik berer ýaly ýagdaýda gurulmalydyr – diýip, Milli Geňeşiň Halk Maslahatynyň Başlygy Ahal welaýatynyň merkeziniň gurluşygy boýunça döwlet komitetiniň başlygy Derýageldi Orazowa ýüzlenip aýtdy.
Şeýle-de, Gurbanguly Berdimuhamedow ýurduň taryhynda öçmejek yz goýan şahsyýetleriň atlaryny täze şäheriň şaýollaryna we köçelerine dakyp, olaryň atlaryny ebedileşdirmegiň zerurdygyna ünsi çekdi. Görnükli şahsyýetleriň atlary şäheriň binalaryna hem olaryň her biriniň aýratynlygy we maksady göz öňünde tutulyp dakylar.
Mundan öň Türkmenistanyň müftüsiniň müdiriýeti ýurduň ähli welaýatlarynda guruljak metjitler üçin ýörite haýyr-sahawat hasabyny açypdy.
ORIENT news
