Saglygy goraýyş we derman senagaty ministrliginiň agyz-burun örtüklerini dakynmak baradaky talaplary bilen baglylykda, Ýol gözegçilik gullugyna görkezmeler berildi
Türkmenistanyň IIM-niň Polisiýanyň ýol gözegçiligi gullugynyň müdirliginiň işgärlerine Saglygy goraýyş we derman senagaty ministrliginiň agyz-burun örtüklerini dakynmak boýunça täzelenen talaplarynyň berjaý edilmegine gözegçilik etmek barada buýruk gelip gowuşdy diýip, ORIENT-e ministrligiň düzümindäki çeşmeler habar berdiler.
Täze düzgünlere laýyklykda, sürüjiler we ýolagçylar gorag lukmançylyk örtüklerini jemgyýetçilik ulaglarynyň ähli görnüşlerinde, şeýle hem köpadamly ýapyk binalarda we döwlet serhediniň barlag-geçiriş nokatlarynda dakynmalydyrlar.
Täze düzgün hususy ulagda agyz-burun örtüklerini dakynmagyň hökmany däldigini aňladýar, çünki resminamada diňe jemgyýetçilik ulaglary barada aýdylýar.
IIM-niň bu Müdirliginiň şahsy düzüminiň köpsanlydygy sebäpli, täze düzdünler baradaky maglumat ähli işgärlere ýakyn günleriň dowamynda ýetiriler.
Ozal Türkmenistanyň Prezidenti Serdar Berdimuhamedow gorag lukmançylyk agyz-burun örtüklerini nähili ýagdaýlarda dakynmalydygyny, nähili ýagdaýda dakynmaly däldigini ilata köpçülikleýin habar beriş serişdeleriniň üsti bilen düşündirmegi tabşyrdy.
ORIENT news
