Serdar Berdimuhamedow hökümetiň öňünde welaýatlary ösdürmek boýunça wezipeleri goýdy
Şenbe güni Prezident Serdar Berdimuhamedow Mary we Lebap welaýatlaryna iş saparlarynyň netijeleri boýunça hökümetiň giňişleýin göçme mejlisini geçirdi. Saparlarynyň dowamynda döwlet Baştutanymyz ýerlerde işleriň ýagdaýy, şol sanda orak möwsüminiň barşy bilen tanyşdy hem-de täze desgalaryň açylyň daýaralaryna gatnaşdy.
Mejlis Türkmenabat şäheriniň Halkara howa menziliniň maslahatlar zalynda geçirildi.
Döwlet Baştutanymyz wise-premýerlere welaýatlary durmuş-ykdysady taýdan ösdürmek, ilatyň durmuş şertlerini gowulandyrmak we täze iş orunlaryny döretmek, importuň ornuny tutmakdan ugur alyp, täze senagat pudaklaryny kemala getirmek, oba hojalyk önümlerini öndürijilere goldaw bermek hem-de hususy ulgamyň mümkinçiliklerini ulanmak boýunça tabşyryklary berdi.
Şeýle hem ýerleriň oba hojalyk ekinlerini ösdürip ýetişdirmek we maldarçylyk üçin netijeli ulanylmalydygy, seçgiçilik we tohumçylyk işleriniň ösdürilmelidigi, suwlylandyrmak usullarynyň kämilleşdirilmelidigi we suw tygşytlaýjy öňdebaryjy tehnologiýalaryň ornaşdyrylmalydygy barada gürrüň edildi.
Hormatly Prezidentimiz durmuşy meselelere degip geçip, ýerlerde okuw mekdeplerini hemme zerurlyklar bilen hem-de çagalar üçin dynç alyşyň guralmagyny öz wagtynda we doly derejede üpjün etmäge, täze okuw ýylyna taýýarlyk görmäge, sanly ulgamlary ulanyp, okatmagyň öňdebaryjy tejribesini öňe ilerletmäge ünsi güýçlendirmegi talap etdi.
Döwlet Baştutanymyz obasenagat toplumyna hem-de onuň üçin hünärmenleri taýýarlamaga dünýäniň iň oňat tejribesini ornaşdyrmaga, bu ulgamda ösen ýurtlar bilen işjeň gatnaşyklary alyp barmaga çagyrdy.
ORIENT news
