Saglygy goraýyş we derman senagaty ministriniň buýrugyndan düşündiriş – agyz-burun örtüklerini nirede ulanmaly
Türkmenistanyň çäginde agyz-burun örtüklerini hökmany dakynmaly:
– jemgyýetçilik ulaglarynyň ähli görnüşlerinde,
– köp adamly ýapyk binalarda,
– döwlet serhediniň barlag-goýberiş nokatlarynda.
Bu düzgünler Türkmenistanyň Adalat ministrliginiň saýtynda ýerleşdirilen Türkmenistanyň Saglygy goraýyş we derman senagaty ministri Nurmuhammet Amannepesowyň 13-nji iýunda çykaran buýrugyndan gelip çykýar. Buýrugyň doly mazmuny bilen şu salgyda tanyşyp bilersiňiz.
Buýruk 2020-nji ýylyň 17-nji awgustynda Türkmenistanda möwsümleýin ýokanç keselleriň öňüni almak üçin kabul edilen wagtlaýyn çäreleriň täzelenen görnüşini tassyklady.
Şeýle hem, resminamada mekdebe çenli ýaşly çagalar üçin agyz-burun örtüklerini dakynmagyň hökmany däldigi bellenilýär.
Mundan ozal Prezident Serdar Berdimuhamedow Keselleriň ýaýramagyna garşy göreşýän adatdan daşary toparyň öňüni alyş çärelerini tapgyrlaýyn gowşatmak teklibini goldapdy we KHBS-niň üsti bilen ilata agyz-burun örtüklerini nirede dakynmaly, nirede dakynmaly däldigini düşündirmegi tabşyrypdy.
ORIENT news
