Türkmenistan we Eýran halkara terrorçylygyna garşy göreşmekde ýörite gulluklaryň özara hereketini güýçlendirerler
Prezident Serdar Berdimuhamedow halkara terrorçylygyna garşy göreşmekde Türkmenistanyň we Eýranyň ýörite gulluklarynyň ýolbaşçylarynyň duşuşyklarynyň geçirilmegini guramagy teklip etdi. Ol bu barada çarşenbe güni Tähranda Eýarnyň Prezidenti Raisi bilen gepleşiklerinde aýtdy.
Döwlet Baştutanymyz halkara terrorçylygyna, narkotrafik we guramaçylykly jenaýatçylyk ýaly howplara garşy göreşmegiň Türkmenistanyň we Eýranyň syýasy-diplomatik hyzmatdaşlygynyň gün tertibinde wajyp orun eýeleýändigini belledi.
Şonuň bilen birlikde, Berdimuhamedowyň pikirine görä, Türkmenistanyň we Eýranyň arasyndaky serhediň howpsuzlygyny üpjün etmek meseleleri möhüm bolmagynda galýar.
Bu ulgamda ylalaşykly çözgütleri işläp taýýarlamak üçin şu ýylyň 15-nji noýabrynda Aşgabatda konsullyk, serhet we gümrük meseleleri boýunça hökümetara toparynyň 15-nji mejlisini geçirmek teklip edildi.
ORIENT news
