Eýranyň Prezidenti: Aşgabat bilen Tähran geljekki iki onýyllyk üçin hyzmatdaşlyk baradaky resminama gol çekmäge taýýar
– Eýranyň Prezidenti Seýed Ebrahim Raisi Türkmenistanyň Prezidenti bilen bolan duşuşygyň netijeleri boýunça geçirilen metbugat maslahatynda Aşgabat bilen Tähranyň gatnaşyklary ösdürmäge çynlakaý çemeleşýändiklerini we geljekki iki onýyllyk üçin ýurtlaryň arasyndaky hyzmatdaşlyk baradaky resminama gol çekmäge taýýardyklaryny aýtdy – diýip, Mehr habarlar agentligi habar berýär.
Şeýle-de, Raisi Serdar Berdimuhamedowyň Türkmenistanyň Prezidenti hökmünde Tährana ilkinji saparynyň goňşy ýurtlaryň arasyndaky gatnaşyklarda möhüm waka öwrüljekdigini belledi.
– Soňky döwürde Türkmenistan bilen Eýranyň arasyndaky hyzmatdaşlyk, aýratyn-da, tebigy gazyň üstaşyr geçirilmeginde, täze derejä çykdy – diýip, EYR-nyň döwlet baştutany aýtdy. Ykdysadyýetde, söwdada, şeýle hem suwdan peýdalanmak we elektroenergetika ýaly ulgamlarda gatnaşyklary ösdürmäge mümkinçilikler bar.
– Şu günki gepleşikler Aşgabat bilen Tähranyň gatnaşyklary ösdürmäge ikitaraplaýyn gyzyklanma bildirýändiklerini tassyklady, muňa dürli ulgamlarda özara düşünişmek hakyndaky Ähtnamalaryň 9-ysyna gol çekilmegi-de şaýatlyk edýär – diýip, Eýranyň Prezidenti aýtdy.
ORIENT news
