Türkmenistanda Hazaryň suwunyň süýjedilip Aşgabada berilmek mümkinçiligi öwrenilýär
Prezident Serdar Berdimuhamedow suw süýjediji desgalary gurmak we Hazar deňzinden Aşgabada suw bermek mümkinçiliklerini öwrenmegi tabşyrdy.
Hepdäniň çarşenbe güni döwlet baştutanynyň oba hojalygyndaky ýagdaý we suw meseleleri boýunça sanly wideoaragatnaşyk arkaly geçiren iş maslahatynda wise-premýer Annageldi Ýazmyradowa bu babatda degişli tabşyryk berildi.
Şeýle-de, Prezident Ýazmyradowyň ýolbaşçylygynda düzümine Oba hojalyk we daşky gurşawy goramak ministrliginiň, Suw hojalygy baradaky döwlet komitetiniň, Ýokary gözegçilik edarasynyň, ylmy institytlaryň, welaýat häkimlikleriniň ýolbaşçylary girýän hökümet toparyny döretmek barada görkezme berdi.
Serdar Berdimuhamedow Amyderýanyň, Garagum derýasynyň hanalarynyň dolup akmagyna böwet bolýan päsgelçilikleri aradan aýyrmak üçin barlaglary geçirmegiň zerurdygyny aýtdy we kanallary, suw akymlaryny arassalamak we betonlamak barada görkezme berdi.
ORIENT news
