Raşid Meredow hem-de Wan I Nur-Sultanda gepleşik geçirdiler
Türkmenistanyň daşary işler ministri Raşid Meredow we Hytaýyň daşary işler ministri Wan I ikitaraplaýyn hyzmatdaşlygyň giň gerimli meselelerini ara alyp maslahatlaşyp, ýokary döwlet derejesinde gazanylan ylalaşyklaryň durmuşa geçirilişine aýratyn ünsi çekdiler. Gepleşikler sişenbe güni, Türkmenistanyň wekiliýetiniň Nur-Sultanda Merkezi Aziýa ýurtlarynyň we Hytaýyň daşary işler ministrleriniň 3-nji mejlisine gatnaşmagynyň çäklerinde geçirildi.
Şeýle hem Türkmenistanyň we Hytaýyň daşary syýasat edaralarynyň baştutanlary özara gyzyklanma bildirilýän sebit we halkara meselelerine degip geçdiler. Söhbetdeşler iri halkara guramalarynda ikitaraplaýyn gatnaşyklary dowam etmegi özara maksat edinýändiklerini tassykladylar diýilip, türkmen DIM-niň saýtynda habar berilýär.
Ikitaraplaýyn söwda-ykdysady meseleleri ara alyp maslahatlaşmagyň barşynda gaz, ulag we kommunikasiýalar ulgamlarynda özara bähbitli hyzmatdaşlyga aýratyn üns berildi.
Türkmen we Hytaý diplomatiýasynyň ýolbaşçylary sebit hem-de dünýä möçberinde howpsuzlygyň we durnuklylygyň üpjün edilmegi baradaky meselelere uly ünsi çekdiler.
Şeýle hem gepleşiklerde saglygy goraýyş, bilim we medeniýet ulgamlarynda mundan beýläk-de hyzmatdaşlyk etmegiň meseleleriniň üstünde durlup geçildi.
ORIENT news
