Saglygy goraýyş we derman senagaty ministrliginiň maslahaty – agyz-burun örtüklerini açyk howada aýyryň
– Agyz-burun örtüklerini ýapyk binalarda we awtoulaglarda dakynyň, açyk howada bolsa aýyryň – diýip, Türkmenistanyň Saglygy goraýyş we derman senagaty ministrliginiň Saglygy goraýşyň habarlar merkezi Türkmenistanyň resmi metbugat sahypalarynda ýatladýar.
Şeýle-de, ministrligiň Saglygy goraýşyň habarlar merkezi şahsy we jemgyýetçilik tertip-düzgünlerini, arassaçylyk kadalaryny yzygiderli berjaý etmegi, elleriňizi ýygy-ýygydan sabyn bilen ýuwmagy we zyýansyzlandyryjy serişdelerden peýdalanmagy ýatladyp, tomus möwsüminde Günüň ýiti şöhlesinden goranmagy maslahat berýär.
Mundan ozal Prezident Serdar Berdimuhamedow 1-nji iýundan Türkmenistanda öňüni alyş çärelerini tapgyrlaýyn gowşatmak teklibini goldapdy.
Bu teklibi degişli halkara tejribesini düýpli öwreren Keselleriň ýaýramagyna garşy göreşýän adatdan daşary topar işläp düzdi.
Türkmenistanyň Saglygy goraýyş we derman senagaty ministrliginiň Saglygy goraýşyň habarlar merkeziniň bu babatda berýän maslahatlary bilen döwlet gazetleriniň bildirişler bölüminde türkmen we rus dillerinde tanşyp bilersiňiz.
ORIENT news
