Türkmenistanyň hökümeti guşçulygyň ösüşine itergi berer
Yurduň guşçulyk pudagynda iş alyp barýan hususy önüm öndürijileri goldamak maksady bilen Türkmenistanyň hökümeti iýmlik bugdaýy, mekgejöweni we soýany ýetişdirmek hem-de bu ekinleri ýetişdirmäge isleg bildirýän taraplara goşmaça ýer böleklerini bölüp bermek barada degişli Karar kabul etdi.
– Prezident Serdar Berdimuhamedow Karara hepdäniň şenbe güni geçirilen Türkmenistanyň Ministrler Kabinetiniň we Döwlet howpsuzlyk geňeşiniň bilelikdäki giňişleýin mejlisinde gol çekdi – diýip, Türkmenistanyň resmi köpçülikleýin habar beriş serişdeleri ýazýar.
Resminama laýyklykda, Türkmenistanyň Oba hojalyk we daşky gurşawy goramak ministrligi, welaýat häkimlikleri, Senagatçylar we telekeçiler birleşmesi ýurtda mekgejöweni 20 müň gektar, soýany 20 müň gektar we iýmlik bugdaýy 40 müň gektar meýdanlarda ekmek we ösdürip ýetişdirmek boýunça çäreleri amala aşyrarlar.
Iýmlik dänäni öndürijileri Oba hojalyk we daşky gurşawy goramak ministrligi tohum we tehniki hyzmatlar bilen, Suw hojalygy baradaky döwlet komiteti suwaryş suwlary bilen, “Türkmenhimiýa” döwlet konserni mineral dökünler bilen üpjün eder.
ORIENT news
