Türkmenistanda Bütindünýä welosiped güni bellenip, köpçülikleýin welosipedli ýöriş guraldy
Hepdäniň anna güni Aşgabatda Türkmenistanyň başlangyjy bilen yglan edilen Bütindünýä welosiped güni mynasybetli Prezident Serdar Berdimuhamedowyň gatnaşmagynda köpçülikleýin welosipedli ýöriş guraldy – diýip, Türkmenistanyň resmi metbugaty habar berýär.
Welosipedli ýöriş Çandybil şaýolunyň we Bekrewe köçesiniň çatrygynda ýerleşen “Welosiped” binasynyň ýanyndan badalga aldy. Bu ýere sport çäresine gatnaşmak üçin Hökümet agzalary, Türkmenistanyň Milli Geňeşiniň Halk Maslahatynyň we Mejlisiniň, harby we hukuk goraýjy edaralaryň, ministrlikleriň hem-de pudaklaýyn dolandyryş edaralarynyň ýolbaşçylary, şeýle-de daşary ýurtly diplomatlar ýygnandylar.
Prezident Serdar Berdimuhamedow welosipedli ýörişe gatnaşyjylaryň kerweniniň öňüni çekdi. Welosipedli ýörişiň geçýän ugry paýtagtyň Çandybil we Bitarap Türkmenistan şaýollary bolup, ýollaryň ugrunda döredijilik toparlaryň çykyşlary guralypdyr.
Welosipedli ýörişe gatnaşyjylar bellenen aralygy geçip, ahyrky nokada - türkmen paýtagtynyň merkezinde ýerleşen “Ruhyýet” köşgüniň ýanyna geldiler. 3-nji iýunda bu çäre bilen bir wagtda welosipedli ýörişler Türkmenistanyň ähli welaýarynda-da geçirildi.
ORIENT news
