Eýranyň üsti bilen Azerbaýjana türkmen gazynyň 1,5 milliard kubmetri ugradylar
Eýranyň üsti bilen Türkmenistandan Azerbaýjana türkmen gazynyň 1,5 milliard kubmetri iberiler. Azerbaýjanyň köpçülikleýin habar beriş serişdeleriniň maglumatlaryna görä, bu barada Eýranyň nebit ministri Jawad Owji Baku energetika maslahatynyň 1-nji gününde habar berdi.
Ministriň aýtmagyna görä, gaz alyş-çalşy Azerbaýjanyň, Eýranyň we Türkmenistanyň gol çeken üçtaraplaýyn şertnamasy esasynda amala aşyrylýar.
Köpçülikleýin habar beriş serişdeleri: “2022-nji ýylyň 3-nji ýanwaryndan Türkmenistanyň, Eýranyň we Azerbaýjanyň gaz alyş-çalşynyň çäklerinde, gazyň bir gije-gündiziň dowamynda 4,5 million kubmetri goýberilip başlandy – diýip, belleýär. Eýran türkmen gazyny ýurduň gündogarynda kabul edip, demirgazyk-gündogarynda Azerbaýjana geçirýär.
Azerbaýjanyň, Eýranyň we Türkmenistanyň arasyndaky gaz alyş-çalşy boýunça şertnama 2021-nji ýylyň 28-nji noýabrynda gol çekildi.
Türkmenistan Aziýa sebitini tebigy gaz bilen üpjün etmekde ilkinjileriň hatarynda durýar, Hytaýa turbageçiriji arkaly gaz ibermekde bolsa birinji orny eýeleýär.
Nury AMANOW
