Türkmen we gruzin hünärmenleri ýuridik şahslary onlaýn bellige almak meselesini ara alyp maslahatlaşdylar
2022-nji ýylyň 2-nji iýunynda Türkmenistanyň Gruziýadaky Ilçihanasynyň ýakyndan ýardam bermeginde Türkmenistanyň Maliýe we ykdysadyýet ministrliginiň we Gruziýanyň Adalat ministrliginiň Milli jemgyýetçilik sanawy agentliginiň wekilleriniň arasynda ýuridik şahslary elektron ulgamy arkaly bellige almak, şeýle hem “Bir penjire” ýörelgesi esasynda ýuridik şahslaryň ýeke-täk döwlet sanawyny ýöretmek we dolandyrmak ugry boýunça onlaýn duşuşyk geçirildi.
Duşuşygyň barşynda gruzin hünärmenleri “Bir penjire” ýörelgesi boýunça öz işlerinde ulanýan tejribeleri bilen paýlaşdylar.
Gün tertibe laýyklykda taraplar ýurduň kanunçylygyna üýtgetmeleri girizmäge degişli bolan kadalaşdyryjy-hukuk binýadyna, tehniki we programma üpjünçiligi soraglaryna we beýleki meselelere seretdiler.
Duşuşygyň soňunda taraplar mundan beýläk hem iki tarapyň gyzyklanma bildirýän ähli soraglary boýunça hyzmatdaşlygy çuňlaşdyrmaga we tejribe alyşmaga taýýardyklaryny bildirdiler.
ORIENT news
