Matwiýenko Putiniň adyndan Türkmenistanyň Prezidentini Russiýa gelmäge çagyrdy
Federasiýa Geňeşiniň başlygy Walentina Matwiýenko hormatly Prezidentimiz Serdar Berdimuhamedowa Russiýanyň Prezidenti Wladimir Putinden salam we sapar bilen Russiýa gelmek baradaky çakylygyň tassyklanmasyny ýetirdi.
Şeýle hem Federasiýa Geňeşiniň ýolbaşçysy söhbetdeşini döwlet Baştutanynyň wezipesine saýlanmagy bilen gutlady.
Walentina Matwiýenko Russiýanyň wekiliýetiniň ikitaraplaýyn diplomatik gatnaşyklaryň ýola goýulmagynyň 30 ýyllygynyň baýram edilýän ýylynda Türkmenistana gelmeginiň ähmiýetli wakadygyny belledi. Ikitaraplaýyn gatnaşyklar özara hormat goýmagyň, özara bahbitliligiň, däbe öwürlen dostlukly aragatnayklaryň esasynda ähli ugurlarda yzygiderli ösdürilýär diýip, Russiýanyň sebitler palatasynyň baştutany belledi.
2021-nji ýylda özara haryt dolanyşygynyň möçberiniň biraz peselendigi bellige alynsa-da, emma, şu ýylyň ýanwar-fewral aýlarynda ol 74% ýokarlandy diýip, Matwiýenko nygtady. Onuň sözlerine görä, Russiýanyň sebitleri hyzmatdaşlygy giňeltmäge uly gyzyklanma bildirýär.
Walentina Matwiýenko Aşgabatda Merkezi Aziýa döwletleriniň we Russiýanyň ilkinji Parlamentara forumynyň ýokary derejede guralandygyny belledi. Onuň sözlerine görä, sekretariatyny Aşgabatda ýerleşdirmek bilen, bu çärä yzygiderlilik häsiýetini bermek baradaky başlangyç goldanyldy.
Söhbetdeşligiň dowamynda Serdar Berdimuhamedow diplomatik aragatnaşyklaryň ýola goýlanyndan bäri geçen otuz ýylyň dowamynda iki ýurduň arasyndaky gatnaşyklaryň dürli ugurlarda üstünlikli ösdürilýändigini belledi. Şeýle hem ol parlamentara gatnaşyklaryny has-da ösdürmegiň wajypdygy barada aýtdy.
Türkmen parlamentiniň ýokary palatasynyň – Halk Maslahatynyň Başlygy Gurbanguly Berdimuhamedow 12-nji maýda Aşgabatda Federasiýa Geňeşiniň başlygy Walentina Matwiýenka “Hyzmatdaşlygy ösdürmäge goşandy üçin” diýen ordeni gowurdy.
Türkmenistanyň Prezidenti Serdar Berdimuhamedow sylagy gowşurmak baradaky Permana gol çekdi.
Şeýle hem dabarada Gurbanguly Berdimuhamedowy GDA gatnaşyjy döwletleriň Parlamentara Assambleýasynyň “MPA SNG. 30 ýyl” diýen ýubileý medaly bilen sylagladylar. Walentina Matwiýenko Aşgabatda 12-nji maýda geçirilýän Merkezi Aziýa döwletleriniň we Russiýanyň Parlamentara forumynyň ýokary derejede guralandygy üçin Halk Maslahatynyň Başlygyna minnetdarlyk bildirdi.
ORIENT news
