Türkmenistan we Täjigistan parlamentara gatnaşyklaryny pugtalandyrmagy ylalaşdylar
Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow we Täjigistanyň Oli Majlisiniň Milli Majlisiniň baştutany Rustam Emomali iki ýurduň parlamentleriniň arasynda hyzmatdaşlyk hakynda ylalaşyga gol çekdiler diýip, Täjigistanyň parlamentiniň metbugat gullugy habar berýär.
Gol çekişlik Aşgabatda Merkezi Aziýa döwletleriniň we Russiýanyň Parlamentara forumynyň çäklerinde geçirildi.
Rustam Emomali çärede çykyş edip, milli parlamentleriň “Merkezi Aziýa – Russiýa” görnüşinde hyzmatdaşlyk etmeginiň uly ähmiýete eýedigini hem-de ýurtlaryň arasyndaky gatnaşyklaryň has-da pugtalandyrylmagyna ýardam etjekdigini belledi.
Soňra Täjigistanyň Oli Majlisiniň Milli Majlisiniň baştutany Türkmenistanyň Prezidenti Serdar Berdimuhamedow bilen duşuşdy. Söhbetdeşler ikitaraplaýyn gatnaşyklaryň ýagdaýyny ara alyp maslahatlaşdylar hem-de Hökümetara söwda-ykdysady hyzmatdaşlyk maksatnamasyny durmuşa geçirmegiň hasabyna ykdysady aragatnaşyklaryň giňeldilmegine gyzyklanma bildirdiler.
Medeni gatnaşyklaryň pugtalandyrylmagyna ýardam bermek maksady bilen, 2022-2023-nji ýyllarda Täjigistan Respublikasynda Türkmenistanyň Medeniýet günlerini guramak we geçirmek teklip edildi.
Rustam Emomali Täjigistanyň Prezidenti Emomali Rahmonyň adyndan hormatly Prezidentimiz Serdar Berdimuhamedowy resmi sapar bilen Täjigistana gelmäge çagyrdy. Çakylyk kabul edildi diýlip, Täjigistanyň parlamentiniň metbugat gullugynyň habarynda aýdylýar.
ORIENT news
