Astanada Ulag hepdeligi we TransLogistica sergisi geçirilýär
Gazagystanyň paýtagty Astanada 14–16-njy oktýabr aralygynda Gazagystanyň Ulag hepdeligi geçirilýär. Onuň esasy wakasy «Ulag we logistika» atly 29-njy halkara sergisi — “TransLogistica Kazakhstan 2026” boldy. Bu iri forum dünýäniň 20-den gowrak döwletinden ulag-logistika bazarynyň öňdebaryjy wekillerini bir ýere jemledi.
Şu ýyl çärä gatnaşyjylaryň geografiýasy Merkezi Aziýa, Ýewropa, Ýakyn Gündogar we Günorta Kawkaz ýurtlaryna degişli 200-den gowrak kompaniýany öz içine alýar. Olaryň hatarynda öz mümkinçiliklerini we infrastruktura taslamalaryny tanyşdyrýan Türkmenistan hem bar. Türkmenistan özüniň üstaşyr ulag mümkinçiliklerini we döwrebap multimodal ulag geçelgelerini işjeň ösdürýär.
Üç güne niýetlenen serginiň iş maksatnamasy bilermenleriň çekişmelerine we strategik mejlislere baýdyr. Forumyň gatnaşyjylary TransÝewraziýa ugurlaryny, şol sanda Orta geçelgäniň (Middle Corridor) mümkinçiliklerini ösdürmek, senagat we energetika pudaklary üçin taslama logistikasyny kämilleşdirmek, şeýle hem üpjünçilik zynjyrlaryna öňdebaryjy IT çözgütlerini, emeli aňy we awtomatlaşdyrma tehnologiýalaryny ornaşdyrmak meselelerini ara alyp maslahatlaşýarlar. Durnukly awtomobil we üstaşyr ulaglary ösdürmek boýunça Hereketleriň Awaza maksatnamasynyň çäklerinde öňe sürlen başlangyçlaryň durmuşa geçirilmegine aýratyn üns berilýär.
“TransLogistica Kazakhstan” sergisinde bilermenler jemgyýetçiliginiň we ulag edaralarynyň giň wekilçilik etmegi Ýewraziýa yklymynda netijeli, howpsuz we tehnologik taýdan döwrebap ulag infrastrukturasyny kemala getirmekde göni dialogyň we döwletara hyzmatdaşlygyň uly ähmiýete eýedigini tassyklaýar.
