Türkmenistanda BSG-a goşulyşmak üçin bilermenleriň taýýarlyk derejesi ýokarlandyrylýar
Aşgabatda Türkmenistanyň Bütindünýä Söwda Guramasyna (BSG) goşulmagynyň aýratynlyklaryna bagyşlanan milli hünärmenleri taýýarlamak boýunça okuw maksatnamasy geçirilýär. Amaly okuw maslahatlary BMG-niň Ösüş maksatnamasy we Türkmenistanyň Maliýe we ykdysadyýet ministrligi tarapyndan guraldy.
Döwlet edaralarynyň, Mejlisiň, bank ulgamynyň, Senagatçylar we telekeçiler birleşmesiniň, şeýle hem degişli ýokary okuw mekdepleriniň 35-den gowrak wekili köptaraplaýyn söwda ulgamynyň iş mehanizmlerini öwrenýär. Okuwyň esasy maksady türkmen bilermenlerine milli öndürijileriň bähbitlerini goramak, ykdysadyýetiň bäsdeşlige ukyplylygyny ýokarlandyrmak we azyk howpsuzlygyny üpjün etmek üçin BSG-niň hukuk kadalaryndan netijeli peýdalanmagy öwretmekden ybaratdyr.
Okuw maksatnamasy çylşyrymly söwda gepleşiklerini geçirmek, bikanun bäsdeşlikden goramak we halkara jedelleri çözmegiň mehanizmlerini ulanmak ýaly amaly meseleleri öz içine alýar. Mundan başga-da, Türkmenistanyň Daşary işler ministrliginiň Halkara gatnaşyklary institutynda diplomatlar we talyplar üçin ýörite umumy okuw sapagy geçirilip, onda bilermenler BSG-ä üstünlikli goşulan ýurtlaryň tejribesini we anyk mysallary seljererler.
Bu okuwlar Türkmenistanda halkara söwda hukugy boýunça bilermenleriň we hukukçylaryň taýýarlygyny kämilleşdirmäge, şeýle hem Türkmenistanyň dünýä ykdysady ulgamyna doly hukukly goşulyşmagy üçin berk binýady döretmäge gönükdirilendir.
