Özbegistan Türkmenistandan we Russiýadan gaz importyny 1,21 milliard dollara çenli artdyrdy
Özbegistan 2026-njy ýylyň ýanwar–awgust aýlarynda Russiýadan we Türkmenistandan tebigy gaz importyny geçen ýylyň degişli döwri bilen deňeşdirilende 15,2 göterim artdyryp, 1,21 milliard dollara ýetirdi. Bu barada The Caspian Post neşiri Özbegistanyň Milli statistika komitetiniň maglumatlaryna salgylanyp habar berýär.
Importyň umumy möçberiniň 124,3 million dollary suwuklandyrylan gaza, şol sanda propana düşdi. Olaryň satyn alnyşy 3,5 esse artdy.
Özbegistanyň gaz importynyň möçberleri ýylyň dowamynda ep-esli üýtgedi. Ýanwar aýynda satyn alyşlar 167,6 million dollar bolan bolsa, fewral aýynda 34,6 million dollara çenli azaldy, şondan soň bolsa gaýtadan artyp başlady. Maý aýynda görkeziji 216,4 million dollara ýetdi, iýun aýynda bolsa ýylyň başyndan bäri iň ýokary derejä — 247 million dollara ýetdi. Iýul aýynda import 38,3 million dollara çenli azaldy, emma awgust aýynda ýene-de artyp, 206,1 million dollara ýetdi. (The Caspian Post)
Importyň artmagyna garamazdan, Özbegistan özünde tebigy gaz çykaryşyny azaltmagyny dowam etdirýär. 2026-njy ýylyň sekiz aýynda ýurtda 24,2 milliard kub metr gaz çykaryldy. 2025-nji ýylyň degişli döwründe bu görkeziji 28,9 milliard kub metr bolupdy. Şeýlelikde, gaz çykarylyşy 16,3 göterim azaldy. (UzDaily.uz)
Şol bir wagtyň özünde, bu döwürde Özbegistanyň tebigy gaz eksporty hem 34,8 göterim azalyp, 322,3 million dollara deň boldy. (UzDaily.uz)
