Türkmenistan we Litwa söwda-ykdysady hyzmatdaşlygy giňeltmegiň meselelerini ara alyp maslahatlaşdy
Aşgabatda Türkmenistanyň Mejlisiniň wekilleri bilen Litwanyň wekiliýetiniň arasynda duşuşyk geçirildi. Duşuşygyň dowamynda taraplar söwda-ykdysady hyzmatdaşlygy giňeltmegiň, şeýle hem ulag we logistika gatnaşyklaryny ösdürmegiň geljekki mümkinçiliklerini ara alyp maslahatlaşdylar.
Duşuşyk 1-nji oktýabrda geçirildi. Litwanyň wekiliýetine Litwa Respublikasynyň Seýminiň Litwa-Türkmen Parlamentara dostluk toparynyň başlygy Dainius Warnas ýolbaşçylyk etdi. Bu barada Türkmenistanyň Mejlisiniň metbugat gullugy habar berdi.
Taraplar söwda-ykdysady, medeni we ynsanperwer ulgamlarda ikitaraplaýyn gatnaşyklary mundan beýläk-de ösdürmegiň meselelerine garadylar.
«Merkezi Aziýa — Ýewropa Bileleşigi» formatynyň çäklerinde özara hyzmatdaşlygyň mümkinçiliklerine aýratyn üns berildi. Litwanyň wekilleri bu formatyň syýasy dialogy, şeýle hem sebit ýurtlarynyň arasynda ulag we logistika geçelgelerini ösdürmek üçin goşmaça mümkinçilikleri açýandygyny bellediler.
Duşuşyga gatnaşyjylar ikitaraplaýyn hyzmatdaşlygyň ugurlarynyň biri hökmünde parlamentara gatnaşyklary ösdürmegiň möhümdigini hem nygtadylar. Hususan-da, kanunçykaryjylyk işi ulgamynda tejribe alyşmak meselesi ara alnyp maslahatlaşyldy.
Türkmenistan bilen Litwanyň arasynda diplomatik gatnaşyklar 1992-nji ýylda ýola goýuldy. Iki ýurduň hyzmatdaşlygy syýasy, söwda-ykdysady, ulag, bilim we medeni-ynsanperwer ulgamlary öz içine alýar.
Ulag we logistika Merkezi Aziýa bilen Ýewropanyň arasyndaky gatnaşyklary ösdürmekde möhüm orun eýeleýär. Türkmenistan Hazar deňziniň üsti bilen geçýän ugurlary ösdürmek üçin mümkinçiliklere eýedir, Litwa bolsa Ýewropa Bileleşiginiň ýurdy bolmak we Baltika deňzine çykalgasynyň bolmagy bilen Merkezi Aziýanyň we Demirgazyk Ýewropanyň bazarlarynyň arasynda baglanyşdyryjy halkalaryň biri hökmünde çykyş edip biler.
