Türkmenistan Hazar deňzinde Kawkaza we Türkiýä elektrik energiýasyny eksport etmek üçin ägirt uly elektrik stansiýasyny gurar
Türkmenistanyň Maýa goýum forumynyň (TIF 2026) energiýa arabaglanyşygyna, howpsuzlygyna we senagat-gurluşyk toplumynyň ösüşine bagyşlanan ikinji sessiýasynda Türkmenistanyň Energetika ministri Annageldi Saparow pudagy döwrebaplaşdyrmak we eksport ugurlaryny giňeltmek boýunça giň gerimli strategiýany hödürledi. Duşuşyk Türkmenistandaky Ýewropada Howpsuzlyk we Hyzmatdaşlyk Guramasynyň (ÝHHG) ilçisi Wilýam Lifiň moderatorlygynda geçirildi. Oňa gurluşyk, binagärlik we senagat ministrlikleriniň ýolbaşçylary, şeýle hem BMG-niň, Ýewropa ykdysady komissiýasynyň (ÝYK) halkara bilermenleri we daşary ýurt işewür toparlarynyň wekilleri gatnaşdy.
Ministrligiň ýolbaşçysy häzirki wagtda Türkmenistanyň energetika ulgamynyň umumy bellenen kuwwaty takmynan 7000 megawata ýetýän 12 sany elektrik stansiýasyny öz içine alýandygyny aýtdy. Bu kuwwat içerki bazaryň barha artýan zerurlyklaryny doly üpjün etmek bilen bir hatarda, daşary ýurtlara elektrik energiýasynyň eksportyny yzygiderli artdyrmaga hem mümkinçilik berýär.
Ýurt tebigy gazyň tassyklanan gorlary boýunça dünýäde dördünji orunda durýandygyna garamazdan, döwletiň energetika diplomatiýasy tebigy serişdeleri tygşytly peýdalanmaga, zyýanly zyňyndylary azaltmaga we halkara ekologik konwensiýalara laýyklykda gaýtadan dikeldilýän energiýa çeşmelerine geçmäge gönükdirilendir.
Şunuň bilen baglylykda, esasy taslamalaryň biri hökmünde Hazar deňziniň kenarynda kuwwaty 1574 megewat bolan täze utgaşykly aýlawly elektrik stansiýasynyň gurluşygyna başlanandygy bellenildi. Bu desganyň işe girizilmegi diňe bir milli energetika ulgamynyň ygtybarlylygyny ýokarlandyrman, eýsem Türkmenistanyň elektrik energiýasyny Hazar deňziniň üsti bilen Kawkaz ýurtlaryna we Türkiýä ibermäge hem mümkinçilik berer.
Şol bir wagtyň özünde Balkan welaýatynda "ýaşyl" özgertmeleriň ilkinji amaly taslamasy — Gyzylarbat etrabynda kuwwatlygy 10 megawat bolan gün we ýel elektrik stansiýasynyň gurluşygy amala aşyrylýar.
Ministr Türkmenistanyň «Türkmenistan – Owganystan – Pakistan» (TOP) ýokary woltly elektrik geçirijiniň türkmen böleginiň gurluşygynyň üstünlikli tamamlanandygyna hem ünsi çekdi. Şeýle hem «Ahal – Mary» we «Balkan – Daşoguz» ugurlary boýunça Aziýa Ösüş Bankynyň gatnaşmagynda maliýeleşdirilen elektrik geçirijisiniň we podstansiýalaryň işe girizilmegi netijesinde ýurduň bitewi halkalaýyn energetika ulgamynyň döredilendigi bellenildi.
Annageldi Saparow pudagyň sanly dolandyryş ulgamlaryny ornaşdyrmak, energiýa netijeliligini ýokarlandyrmak we eksport ugurlaryny mundan beýläk-de diwersifikasiýa etmek maksady bilen Ýewropanyň, Ýaponiýanyň, Hytaýyň we Koreýa Respublikasynyň maýadarlary hem-de kompaniýalary bilen işjeň gepleşiklere taýýardygyny tassyklady.
