Döwletmämmet Azady adyndaky Türkmen milli dünýä dilleri instituty Ýaponiýanyň DIM-niň Hormat hatyna mynasyp boldy
Ýaponiýanyň Daşary işler ministrligi 2026-njy ýyl üçin Ýaponiýanyň daşary syýasat edarasynyň ýolbaşçysynyň Hormat haty bilen sylaglananlaryň sanawyny yglan etdi. Ýapon dilini okatmagyň ösdürilmegine goşan uly goşandy üçin bu ýokary sylaga Döwletmämmet Azady adyndaky Türkmen milli dünýä dilleri instituty mynasyp boldy.
Ýaponiýanyň Daşary işler ministrliginiň Hormat haty halkara gatnaşyklaryny pugtalandyrmaga we Ýaponiýa bilen dostlukly gatnaşyklary ösdürmäge aýratyn goşant goşan dünýäniň dürli ýurtlarynyň raýatlaryna we guramalaryna berilýär. Şu ýyl bu abraýly sylaga dürli ýurtlardan 159 adam we 67 gurama mynasyp boldy.
Türkmen institutyna Hormat hatynyň gowşurylmagy onuň ýapon dilini bilýän hünärmenleri taýýarlamakda gazanan ýokary netijeleriniň, şeýle hem Türkmenistan bilen Ýaponiýanyň halklarynyň arasynda medeni-ynsanperwer dialogyň we özara düşünişmegiň giňeldilmegindäki möhüm ornunyň ykrar edilmesidir.
ORIENT
