Aşgabatda pars edebiýatynyň güni mynasybetli şygyryýet agşamy we bäsleşik geçirildi
25-nji sentýabrda Eýranyň Türkmenistandaky ilçihanasynyň Medeni merkezinde medeni agşam we döredijilik bäsleşigi geçirildi. Çäre Pars şygyryýetiniň we edebiýatynyň gününe, şeýle hem belli eýran şahyry Şahriýaryň (Seýid Muhammedhüseýin Behjat Tebrizi) hatyrasyna bagyşlandy.
Baýramçylyk çäresine Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani, medeniýet meseleleri boýunça geňeşçi Abdolreza Abbasi, eýranly diplomatlar, şeýle hem pars dili okuwlarynyň okuwçylary we mugallymlary gatnaşdylar.
Myhmanlary gutlap, geňeşçi Abdolreza Abbasi şahyr Şahriýaryň pars we azerbaýjan dillerindäki döredijiliginiň Eýran bilen türki dilli halklaryň arasynda özboluşly medeni köpri bolup hyzmat edýändigini belledi. Ol Magtymguly Pyragy, Jelaleddin Rumy, Nyzamy Genjewi we Şahriýar ýaly beýik şahyrlaryň mirasynyň halklaryň köp asyrlyk dostlugyny we ruhy umumylygyny alamatlandyrýandygyny nygtady. Ilçi Ali Mojtaba Ruzbehani bolsa Şahriýaryň şygyryýetiniň sadalygy, çynlakaýlygy we çuňňur manysy bilen tapawutlanýandygyny aýtdy.
Maksatnamanyň çäklerinde okuwçylaryň we mugallymlaryň toparlarynyň arasynda bäsleşik geçirildi.
Gatnaşyjylar goşgy okadylar, edebiýat boýunça soraglara jogap berdiler, diwarlyk gazetleri taýýarladylar, ýaňyltmaçlary aýtmak boýunça ýaryşdylar we pars dilindäki multfilmlere ses berdiler.
Bäsleşigiň netijeleri boýunça ýeňiji toparyň mugallymyna Eýranyň milli «terme» saçagy gowşuryldy. Beýleki ähli gatnaşyjylar we mugallymlar Medeni merkeziň adyndan ýadygärlik sowgatlaryna mynasyp boldular.
ORIENT
Şu tema boýunça:
