Porsche dolulygyna elektromobilleriň gaýtadan işlenen batareýalaryndan öndürilen akkumulýator döretdi
Porsche kompaniýasy Cylib startapy bilen bilelikde 100 göterim gaýtadan işlenen katod materialyndan öndürilen tejribe akkumulýator elementlerini işläp taýýarlady. Täze elementler üçin zerur bolan litiý, nikel, kobalt we marganes nemes awtoulag öndürijisiniň elektromobilleriniň ulanyşdan çykan batareýa bloklaryndan doly görnüşde alyndy.
Çig malyň gaýtadan işlenmegi Germaniýadaky zawodda ekologiýa taýdan has arassa suw usuly — gidrometallurgiýa arkaly geçirildi. Ilkinji synaglar alnan öýjükleriň tehniki taýdan ulanmaga ýaramlydygyny eýýäm tassyklady. Gaýtadan işlenen ikilenji materiallaryň Porsche-niň seriýaly akkumulýatorlarynda ulanylmagy 2028-nji ýyla meýilleşdirilýär.
Bu işlenip taýýarlama Ýewropa Bileleşiginde hereket edýän kadalardan 16 esse ýokary görkeziji gazandy. ÝB-niň düzgünlerine laýyklykda, 2031-nji ýyla çenli täze batareýalarda gaýtadan işlenen litiýiň we nikeliň paýy bary-ýogy 6 göterim, kobaltyň paýy bolsa 16 göterim bolmaly. Porsche-niň yglan eden 100 göterimlik görkezijisi brendi önümçiligiň ýapyk aýlawly ulgamyna geçmäge taýýardygyny görkezýär.
Köpçülikleýin derejede ikilenji materiallara geçmäge häzirlikçe päsgel berýän esasy faktor köne batareýalaryň ýetmezçiligidir. Ýewropadaky elektromobilleriň köpüsi heniz ulanyşda, üstesine-de, üpjün edilýän akkumulýatorlaryň takmynan 90 göterimi Hytaýda we Günorta Koreýada öndürilýär.
ORIENT
